Stórlaxapar í Tungufljóti í Biskupstungum

Þær eru nokkrar árnar í uppsveitum suðurlands sem eiga oft góða endaspretti með stórlöxum og má þar nefna sem dæmi Stóru Laxá, Fossá, Kálfá og Sogið en Tungufljót er klárlega í þessum hóp. Þeir sem hafa verið þar við veiðar í haust hafa sett í marga væna laxa og tíðrætt hefur verið milli þeirra sem hafa verið þarna við veiðar að í Faxa liggji rígvænn hængur sem hefur sloppið af í það minnsta eitt skipti hjá veiðimanni eftir tæpa klukkustundar baráttu.

Við teljum nokkuð ljóst að þessi hængur sé loksins búinn að lúta í lægra hald gagnvart veiðimanni en í gær var 102 sm hæng landað í Faxa og eins og meðfylgjandi mynd ber með sér er þetta þykkur og fallegur hausthængur. Eins og það þurfi að toppa þetta þá setti sama veiðigengi í 102 sm hrygnu. Veiði fer senn  að ljúka í Tungufljóti en ef það eru lausir dagar er þetta klárlega eitthvað til að skoða því það eru fleiri vænir laxar sem hafa verið að sýna sig í ánni síðustu daga.