Forstjórinn sem endar stundum ein á dansgólfinu

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna yfirleitt um sjö þrjátíu, sem er um það bil eins seint og ég kemst upp með. Ég hef alltaf verið B týpa og það hefur lítið breyst með aldrinum. En síðdegin eru þeim mun skilvirkari hjá mér. 

Ég vildi geta sagt að ég fari í ræktina eða hugleiði á morgnana en allar tilraunir til þess hafa fallið um sig sjálfar eftir eitt til tvö skipti. Nú síðast í vor þegar ég bókaði mig hjá einkaþjálfara hálf átta einu sinni í viku. Maðurinn minn benti mér þá kurteislega á að ég ætti nú að vera farin að þekkja sjálfa mig betur, sem reyndist alveg rétt ábending.“

Hvað er það fyrsta sem þú gerir á morgnana?

„Það fyrsta sem ég geri er að blanda grænan vítamíndrykk fyrir okkur hjónin og strax þar á eftir geri ég góðan kaffibolla sem ég er stundum farin að geta drukkið í ró og næði eftir að börnin urðu sjálfbjarga á morgnana.

Annars er bara að koma öllum af stað út í daginn og alveg ný morgunstund er að skutla syni mínum í Versló á leið minni í vinnuna. Umferðarteppan úr Garðabæ er að gefa alveg frábærar gæðastundir með honum á morgnana.“

Hvaða lag frá unglingsárunum fær þig alltaf út á dansgólfið?

„Mér hefur alltaf þótt gaman að dansa svo það hefur nú ekki þurft mikið til og mörg lög sem koma mér á dansgólfið. Unfinished Sympathy með Massive attack og eiginlega allt með Snap og KLF virkar vel.

Við æskuvinkonurnar þróuðum mjög töff dansspor með þessum lögum á sínum tíma sem eru alltaf tekin ef við erum saman. 

Ice Ice Baby með Vanilla Ice kemur mér líka alltaf í stuð en hefur af einhverjum undarlegum ástæðum ekki elst vel fyrir neinn nema mig svo ég er þá ein á dansgólfinu ef það er sett á.“

Í hvaða verkefni ertu að vinna helst í þessa dagana?

„Við erum í stóru umbreytingarverkefni hjá Greiðslumiðlun Íslands en stærsta fyrirtækið í samstæðunni er Motus. Við höfum verið að byggja upp sterka innviði, bæði kerfi og öflugt starfsfólk, og erum mjög spennt að koma út með ýmsar nýjungar í kröfuþjónustu á næstu mánuðum. 

Þetta er sögulega frekar gamaldags bransi sem við erum að fara að umbylta og það er alltaf gaman að geta betrumbætt hlutina svo um munar.

Akkúrat núna erum við svo í okkar árlegu uppfærslu á stefnunni okkar, helstu markmiðum og verkefnunum framundan. Það er alltaf skemmtilegur tími á haustin þegar allt er að keyrast í gang og fólk kemur ferskt undan sumri.“

Hvernig skipuleggur þú þig í vinnu?

Outlook stjórnar lífi mínu bæði í vinnu og einkalífinu. Mottóið er að ef það er ekki í Outlook þá er það ekki að fara að gerast. 

Ég elska gott skipulag og hef prófað alls konar forrit og öpp til að skipuleggja mig en á endanum er það bara gamla góða Outlook og tölvupósturinn sem virkar best fyrir mig.“

Hvenær ferðu að sofa á kvöldin?

„Ég er oft komin í rúmið milli tíu og ellefu og sofna frekar fljótt eftir það. Þó að ég sé B týpa að upplagi þá hef ég orðið kvöldsvæfari með árunum og er reyndar mögulega örlítið ferskari á morgnana fyrir vikið.“