Húfan sem fór í klósettið hélt samt áfram að vera í uppáhaldi

Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.

Hvað finnst þér skemmtilegast við tískuna?

Hvað hún segir um okkur hverju sinni, hún endurspeglar tíðarandann.

Ég myndi ekki vilja vera ósnortin af tískunni, það er svo gaman að vera opin fyrir innblæstri.

Hver er uppáhalds flíkin þín og af hverju?

Síðasta vetur keypti ég síða dúnkápu og hún kom sér vel. Ég fer mikið í bíó og breiddi hana stundum yfir mig eins og dúnsæng. 

Svo dettur mér í hug aðsniðinn Prada leðurjakki af mömmu minni sem mér þykir vænt um. Ég er mikið fyrir góðar yfirhafnir.

Eyðirðu miklum tíma í að velja föt hverju sinni?

Kannski ekki miklum tíma en mér finnst gaman að leggja hugsun í það.

Hvernig myndirðu lýsa stílnum þínum?

Smá kærulaus með fínlegu, feminine ívafi og stundum töffaralegur líka. Ég kaupi oft vintage og fer reglulega með það sem þarf að laga til skraddarans. Svo er ég hrifin af fallegum skartgripum, sérstaklega hringum.

Hefur stíllinn þinn breyst mikið í gegnum tíðina og hvernig þá?

Já, hann hefur breyst í gegnum tíðina bara eins og ég sjálf þótt það sé kannski einhver kjarni. Ég er klofin yfir hugtakinu tímaleysi þegar rætt er um stíl því við erum verur í tímanum og ekkert listaverk er tímalaust að mínu mati. 

Þá á ég ekki við að það úreldist heldur að það sé í samtali við umhverfið og tímabilið sem það sprettur upp úr, sem er svo skemmtilegt. Þannig breytingar eru spennandi. 

En það sem er vandað stenst tímans tönn, þess vegna nota ég flíkur oft árum saman og reyni að velja mér föt með það í huga.

Hvaðan sækirðu innblástur í tískunni?

Ég verð auðveldlega fyrir áhrifum úr öllum áttum sem ég held að sé ekki slæmt, því ég er líka með ákveðinn smekk og yfirleitt óhrædd við að treysta honum.

Ertu með einhver boð og bönn þegar það kemur að klæðaburði?

Engin þegar kemur að útlitinu. 

En í mínum bókum er bannað að vera í of litlum skóm, það er mikilvægt að geta veifað tánum og svo klæði ég mig alltaf vel, mér má ekki verða kalt og ég vil heldur ekki að öðrum verði kalt.

Hver er eftirminnilegasta flík sem þú hefur klæðst og af hverju?

Erfitt að velja eina. Handlitaður kjóll frá Paloma Wool sem ég notaði í útgáfuhófi fyrir bókina mína í fyrra. Dettur líka í hug flísfóðruð húfa sem ég átti þegar ég var lítil, hún var ekki tískuyfirlysing en ég var alltaf með hana. 

Bekkjarbróðir minn henti henni í klósettið en ég veiddi hana upp úr. Ekkert gat stöðvað þessa húfu.

Býrðu yfir einhverju góðu ráði þegar það kemur að tísku?

Gæði umfram magn. Og finna sér klæðskera ef þú saumar ekki sjálf/t/ur. Það munar öllu að geta farið með falleg föt i viðgerð.