Tóku skyndiákvörðun út frá ómissandi sólarlagi

Hér má sjá tónlistarmyndbandið:

Hildur Kristín Stefánsdóttir og Ragna Kjartansdóttir hafa báðar vakið athygli fyrir sólóverkefni sín, Hildur undir eigin nafni og Ragna undir nafninu Cell7. Lagið Got This Thing er samið, pródúserað og gefið út af þeim sjálfum. Segja má að þær séu brautryðjendur sem kvenkyns pródúserar í íslenskri danstónlist.

Ný ást og nýir tímar

„Á síðasta ári var hljómsveitin tilnefnt til Íslensku Tónlistarverðlaunanna fyrir fyrsta lagið okkar Bounce Back. Nýja lagið, Got This Thing, er innblásið af nýrri ást, að rúnta um í bleiku sólarlagi og tilhlökkun fyrir nýjum tímum.“

Myndbandið er framleitt af Kjartani Trauner og segja þær að myndbandið hafi verið skotið mjög spontant eitt fallegt ágústkvöld í Reykjavík.

„Við vildum að tónlistarmyndbandið næði stemningu lagsins og okkur langaði að skjóta það við fallegt sólarlag. Við höfðum fylgst með veðurspánni og vorum þetta kvöld á leiðinni í myndatöku þegar við sáum hvað stefndi í fallegt sólarlag.

Með hálftíma fyrirvara ákváðum við frekar að taka upp tónlistarmyndband þar sem himinninn var svo fallegur í húminu. Kjartan tók myndbandið upp á gamla Canon myndbandsupptökuvél frá árinu 2000 sem gaf skemmtilegan blæ.

Allt myndbandið var tekið upp á 90 mínútum við Skarfaklett. Þetta voru mjög lifandi upptökur og í einu rennslinu birtust allt í einu um 20 sjósundskonur upp úr þurru. Það var geggjað móment og okkur fannst þetta allt minna okkur á einhvern skandinavískan draum.“

Það er margt á döfinni hjá RED RIOT sem stefna á að gefa út sína fyrstu breiðskífu síðar í vetur. Hér má hlusta á sveitina á streymisveitunni Spotify.