Býður fólki að veita gömlum peysum nýtt líf

Sýning Ýrúrarí ber titilinn Nærvera. Þar leikur hönnuðurinn, sem heitir réttu nafni Ýr Jóhannsdóttir, sér með mörk búninga og hversdagsklæðnaðar. Undanfarin ár hefur sjálfbærni og endurvinnsla verið meginatriðið í verkunum, sem eru aðallega unnin með efnivið sem safnast upp á endurvinnslustöðvum.

Í smiðjunum tveimur, sem haldnar verða sunnudagana 20. og 27. ágúst frá klukkan 13, verður frítt inn og efniviður til viðgerða verður í boði á staðnum en þátttakendur mega gjarnan koma með eigin efnivið, að því er segir í tilkynningu um þær.

Húmorinn og leikgleðin að leiðarljósi

Á sýningunni gefur að líta nýjar peysur eftir Ýrúrarí. Ferlið byggist á tilraunum með fjölbreyttar aðferðir og útfærslur sem veita ósöluhæfum peysum úr endurvinnslustöðvum sterkari nærveru svo þær haldist í notkun um ókomna tíð. 

Í anda fyrri verkefna Ýrúrarí eru peysurnar unnar á húmorískan hátt með leikgleði að leiðarljósi. Markmiðið er að lífga upp á hversdaginn og lengja líftíma fatnaðar sem við eigum nú þegar.

Verk eftir Ýrúrarí má meðal annars finna í ýmsum spennandi fataskápum en einnig í safneignum Textiel Museum í Hollandi, Museum für Kunst und Gewerbe í Hamborg, Museum of International Folk Art í Nýju Mexíkó, National Museums of Scotland og Hönnunarsafni Íslands.