Tork gaur: Myndi allan daginn velja kraftinn fram yfir drægnina

James Einar Becker er stjórnandi þáttanna, Tork gaurinn sjálfur. Mustang Mach-E GT er sportútgáfan af Mustang Mach-E. Í þættinum segir James Einar að drægnin á sportútgáfunni sé minni en krafturinn meiri. „Maður fórnar drægninni fyrir kraftinn. Ekki að það skipti mig neinu máli persónulega, ég myndi allan daginn velja kraftinn fram yfir drægnina.“

Til marks um kraftinn bendir James Einar á að bíllinn er 480 hestöfl og er 3,7 sekúndur að fara frá núll upp í hundrað kílómetra hraða á klukkustund.

Samkvæmt James Einari hefur bíllinn farið svolítið í taugarnar á sumum Mustang aðdáendum.

„Þeir eru yfirleitt vel miðaldra menn sem áttu bensín Mustang bíla í æsku eða eru aldir upp við það að feður þeirra eða bræður áttu Mustang. Þess vegna finnst þeim þessi rafmagns-Mustang ekki vera alvöru Mustang. Mögulega hafa þeir eitthvað til síns máls.“

James Einar heldur að það eigi þó ekki að hugsa um þennan Mustang sem framhald af hefðinni sem fylgir merkinu. 

„Ég held að við verðum að átta okkur á því að rafmagns Mustang og bensín Mustang eru ekki svipaðir bílar, þetta eru mjög fjarskyldir frændur.“

Hann segir bílinn hafa fengið að vera Mustang því Ford vantaði eitthvað grípandi í markaðsefnið fyrir bílinn. „Vel spilað Ford.“