Besta-spáin 2023: Langlíklegastir til afreka

Íþróttadeild Vísis og Stöðvar 2 Sports spáir að venju fyrir um gengi liðanna í Bestu deild karla með árlegri spá sinni fyrir mótið. Keppni í deildinni hefst með heilli umferð á annan í páskum, mánudaginn 10. apríl. Breiðablik á titil að verja en liðið varð Íslandsmeistari í annað sinn í fyrra.

Íþróttadeild spáir Breiðabliki 1. sæti Bestu deildarinnar í sumar og liðið verji Íslandsmeistaratitilinn sem það vann í fyrra.

Blikar byrjuðu síðasta tímabil af feykilega miklum krafti, unnu fyrstu átta leiki sína og voru alltaf í bílstjórasætinu í toppbaráttunni eftir það. Svo fór að Breiðablik varð Íslandsmeistari með talsverðum yfirburðum. Liðið vann tuttugu og 27 leikjum sínum í Bestu deildinni og fékk tíu stigum meira en KA sem endaði í 2. sæti. Ekkert lið skoraði fleiri mörk en Blikar (66) og ekkert lið fékk á sig færri (27).

Síðast þegar Breiðablik varð Íslandsmeistari, 2010, klikkaði liðið á að styrkja sig fyrir titilvörnina. Ekki er hægt að saka Blika um það núna. Breiðablik hefur fengið fjölda leikmanna í vetur, meðal annars tvo færeyska markahróka og hópurinn stór og gríðarlega öflugur. Bestu leikmenn Blika á síðasta tímabili, Ísak Snær Þorvaldsson og Dagur Dan Þórhallsson, eru hins vegar horfnir á braut og skörð þeirra verða vandfyllt.

Eins og staðan er núna er Breiðablik langlíklegast til að verja Íslandsmeistaratitilinn og þá stefnir liðið á að komast í riðlakeppni í Evrópukeppni, fyrst íslenskra liða. Hópurinn virðist allavega vera samsettur með það í huga. 

Svona var síðasta sumar í tölum

Liðið og lykilmenn

Höskuldur Gunnlaugsson (f. 1994): Fyrirliði Íslandsmeistaranna og einn mikilvægasti leikmaður þeirra ásamt því að vera einn besti leikmaður deildarinnar. Þrátt fyrir að vera oftast nær stillt upp í hægri bakverði þá er hann út um allan völl. Er með góðan hægri fót, getur bæði gefið fyrir og skotið þegar þess þarf.

Gísli Eyjólfsson (f. 1994): Enn einn úr þessum fræga ´94 árgangi í Kópavogi. Hefur verið einn besti miðjumaður deildarinnar undanfarin ár og á mikinn þátt í góðu gengi Blika undanfarin ár. Stórskemmtilegur miðjumaður sem getur í raun gert allt. Í liði fullu af frábærum leikmönnum stendur hann reglulega upp úr.

Jason Daði Svanþórsson (f. 1999): Glímdi við töluvert af meiðslum á síðustu leiktíð á meðan annar drengur úr Mosfellsbæ stal fyrirsögnunum. Var samt sem áður frábær í mögnuðu Blikaliði og verður eflaust enn betri í sumar. Það er sem boltinn sé límdur við tærnar á honum þegar hann fer af stað og munu eflaust margir vinstri bakverðir deildarinnar íhuga að hringja sig inn veika þegar þeir eiga að mæta Íslandsmeisturunum.

Markaðurinn

Blikar virðast hafa gert hörkugóð viðskipti í vetur þó að vissulega verði krefjandi fyrir þá að spjara sig án tveggja af albestu mönnum deildarinnar í fyrra.

Félagið fékk meðal annars til sín Færeyingana Patrik Johannesen og Klæmint Olsen sem ættu að vera ágætis ávísun á mörk, og auk þess er Stefán Ingi Sigurðarson kominn heim úr láni og Eyþór Aron Wöhler mættur eftir að hafa staðið sig vel hjá ÍA síðasta sumar.

Patrik skoraði tólf mörk fyrir Keflavík í Bestu deildinni í fyrra og Eyþór níu fyrir ÍA, á meðan að Stefán Ingi raðaði inn sextán mörkum í deild og bikar fyrir HK sem komst upp úr Lengjudeildinni. Klæmint hefur svo átt fimm tímabil með yfir tuttugu mörkum fyrir NSÍ í Færeyjum en skoraði reyndar „aðeins“ níu í fyrra. Ágúst Eðvald Hlynsson er einnig líklegur til að slá í gegn á sínum gamla heimavelli.

Aftar á vellinum hefur Breiðablik fengið Oliver Stefánsson og Arnór Svein Aðalsteinsson sem gerir baráttuna um sæti í vörninni afar forvitnilega, og bakvörðurinn Alex Freyr Elísson ætlar sér að slá í gegn eftir frábært tímabil með Fram í fyrra. Þá sneri Alexander Helgi Sigurðarson aftur í Kópavoginn eftir eitt ár í Svíþjóð.

Að lokum ...

Allir og amma þeirra gera ráð fyrir því að Breiðablik verji Íslandsmeistaratitilinn og ekki að ástæðulausu. Þeir eru með sterkasta leikmannahópinn, mikla reynslu og mikla hæfileika. Blikar eiga þó vafalítið eftir að sakna Ísaks og Dags enda einstakir leikmenn í íslenskum fótbolta. En liðsstyrkurinn sem er kominn í staðinn ætti að milda höggið.

Spurningin er bara hvar einbeiting Blika mun aðallega liggja og hvernig gengur að halda nokkrum boltum á lofti. Þeir ætla sér greinilega langt í Evrópukeppni og eru tilbúnir að leggja ýmislegt í sölurnar til þess. Kemur það niður á árangrinum heima fyrir?

Þetta er samt hálmstrá. Það þarf virkilega að leita eftir veikleikum hjá þeim grænu sem ættu ef allt er eðlilegt að halda Íslandsmeistarabikarnum hjá sér í Smáranum.