„Það hefur verið mikill sómi af þessu“

„Þetta er erfitt verkefni en þeir [Valsmenn] eru búnir að sýna að allt er mögulegt. Þetta er úrslitaleikur fyrir þá, þeir geta tryggt sig sjálfir áfram og hafa þetta í eigin hendi, og hljóta að láta vaða eins og hægt er,“ segir Dagur í viðtali sem sjá má hér að neðan.

Fjögur lið af sex í riðli Vals komast áfram í 16-liða úrslit. Þegar tvær umferðir eru eftir er hörð barátta um 3. og 4. sæti en Valur er í 3. sæti með 7 stig, PAUC og Ferencvaros með 6 stig og Benidorm 4. Flensburg og Ystad hafa þegar tryggt sig áfram. Valsmenn eru því í kjörstöðu og búnir að sýna að þeir áttu svo sannarlega fullt erindi í riðlakeppni Evrópudeildarinnar.

„Mér finnst búinn að vera mikill sómi að þessu. Evrópuleikirnir í fyrra, gegn Lemgo, og svo allir leikirnir í ár. Búnir að spila við lið eins og Flensburg en enginn skellur. Alltaf inni í öllum leikjum. Þeir hefðu getað náð í aðeins betri úrslit en voru óheppnir í einhverjum leikjum.

En það hefur verið mikill sómi að þessu, líka fyrir félagið. Það hefur verið gríðarlega skemmtilegt og góð umgjörð hérna [í Origo-höllinni]. Mikið af fólki að koma sem kemur ekki endilega oft á handboltaleiki. Það hefur verið mjög gaman að fylgjast með,“ segir Dagur og bætir við:

Allra liða kvikindi sem koma og styðja

„Þetta eru fimm heimaleikir og svo fimm útileikir í beinni útsendingu. Það er nóg að fylgjast með og þetta gefur öllum mikið. Maður sér að það eru ekki bara Valsarar sem mæta á völlinn hérna. Það eru allra liða kvikindi sem koma og fylgjast með, styðja og vita að það skiptir máli fyrir íslenskan handbolta að standa sig í Evrópu. Fyrir félagsliðin að láta aðeins vita af sér, svo þetta sé nú ekki bara í janúar [þegar karlalandsliðið spilar á stórmótum].“

Aðspurður hvað Valsmenn þurfi að hafa í huga varðandi mótherja sína í kvöld segir Dagur:

„Lykilatriðið fyrir Valsmenn er að klára dauðafærin sín gegn sterkum markvörðum. Það er mikilvægt að klára fyrstu hornaskotin, línuskotin, hraðaupphlaupin og vítaskotin, því allt annað verður erfitt og engin dauðafæri. Svo þurfa þeir að spila góða vörn gegn þungum Frökkum, stórum og sterkum, sem hafa einhverja líkamlega yfirburði. Þeir eiga eftir að stilla mikið upp tveir á móti tveimur, með þessa línumenn og reyna að troða boltanum inn á þá. Það getur orðið erfitt fyrir Valsmenn að eiga við það.“

Nánar er rætt við Dag í myndbandinu hér að ofan.

Leikur Vals og PAUC hefst klukkan 19:45 og er líkt og aðrir leikir Vals í Evrópudeildinni í beinni útsendingu á Stöð 2 Sport.