Magnaður píanóflutningur Víkings Ólafs­sonar á eyði­eyju

Flugu með píanó á eyðieyju

Í samtali við Vísi segir Erlendur, leikstjóri myndbandsins, að þau hafi flogið með píanó út í Engey til að taka upp þennan tónlistarflutning. Kristín Sævarsdóttir, sem framleiddi myndbandið, er eigandi píanósins og komst það að heilu og höldnu fram og til baka. Baldvin Vernharðsson sá um kvikmyndatöku.

Sjón er sögu ríkari en myndbandið má finna í spilaranum hér að neðan:

Þau tóku einnig upp myndband af gerð tónlistarflutningsins og eins og sjá má er ansi metnaðarfullt verk að baki:

Gefur von og færir ljós

„Við ansi stolt með viðbrögðin sem myndbandið hefur fengið,“ segir Erlendur og bætir við:

„Engey er ansi áhugaverð eyðieyja. Þar var búið lengi vel og má rekja hina víðfrægu Engeyjarætt þangað. Þar eru rústir í dag og minnisvarðar um kirkju sem eitt sinn stóð þar.“

„Þetta lag er mjög oft spilað á dimmustu stundum lífs okkar, til að gefa von og færa ljós,“ segir Víkingur Heiðar meðal annars í tengslum við valið á Ave María.

Magnað augnablik

Frægðarsól Víkings skín ansi skært um þessar mundir enda er hann einn eftirsóttasti píanóleikari heims og er lagið tekið af nýútgefinni plötu hans From Afar sem hefur hlotið mjög góðar viðtökur.

„Undir lok myndbandsins, þegar Víkingur slær seinustu nótu sína, er hrafn sem flýgur af stað í átt að myndavélinni, eins og um sé að ræða þaulæft augnablik. Þess má geta að þetta er ansi mögnuð tilviljun og náðust viðbrögð leikstjóra á mynd,“ segir Erlendur en hægt er að sjá þau í gerð myndbandsins.

Hér má sjá nokkrar vel valdar myndir frá tökustað: