Arsenal og Brighton komast að samkomulagi um Trossard

Arsenal mun greiða 21 milljón punda fyrir leikmanninn, en það samsvararar tæplega 3,8 milljörðum króna. Árangurstengdir bónusar gætu þó hækkað verðið upp í 27 milljónir punda.

Það eru hinir ýmsu miðlar sem greina frá því að samningar milli Arsenal og Brighton séu svo gott sem í höfn, en þar á meðal er félagsskiptasérfræðingurinn Fabrizio Romano.

Trossard mun að öllum líkindum skrifa undir fjögurra ára samning við Arsenal og búist er við því að samningar verði í höfn á næsta sólarhringnum.

Leikmaðurinn hefur verið í herbúðum Brighton síðan árið 2019 og hefur skorað 25 mörk í 116 deildarleikjum fyrir liðið. Þá á þessi 28 ára gamli kantmaður að baki 24 leiki fyrir belgíska landsliðið þar sem hann hefur skorað fimm mörk.