Fata­línan inn­blásin af verð­bréfa­mörkuðum og vaxta­breytingum

„Nasdaq skyrta við FTSE buxur er til dæmis mjög hátíðlegt dress fyrir jólin. Í munstrinu eru reyndar bara grænar tölur hjá mér enda er ég mjög bjartsýn að eðlisfari. Er með þessari línu að vonast til að fá fleiri viðskiptavini til mín sem starfa í Borgartúni sem við þekkjum sem Wall Street Íslands.“

Hún lýsir línunni sem skrifstofuglam.

„Vísitölur, verðbréf og vesen. Market is going up! Grænar tölur og blússandi bjartsýni. Kannski ekki alveg staðan í dag en eigum við ekki bara að segja að ég sé skyggn? Vissuð þið að það er til vísitala fyrir pilssídd?“

Eygló segir að það hafi líklega verið áhugi hennar á peningum sem kveikti á þessu.

„Skrifstofufagurfræði. Það er af nógu að taka þarna. En svona grínlaust þá held ég bara að ég hafi verið að horfa of mikið á fréttir um verðbólgu og hækkandi vexti.“

Í dag er hún einn af eigendum verslunarinnar KIOSK úti á granda og selur þar hönnun sína en hún á þó bakgrunn í skrifstofustörfum.

„Ég vann einu sinni á ónefndri skrifstofu í Borgartúninu. Var þá sérstaklega upprifin af stóru ljósritunarvélinni sem var líka faxtæki. Þið fyllið í eyðurnar.“

Hönnuðurinn eyðir aðventunni að mestu leyti í versluninni sinni en langar samt að skapa nýjar jólahefðir í bland við að njóta þeirra gömlu. 

„Aðventan er aðallega viðvera í Kiosk með mínum dásamlegu kollegum sem hleypa mér samt alltaf útí skötu á réttum tíma á Þorlák. Þegar ég er búin að ná skötulyktinni almennilega af mér þá þykir mér voða gott að fara í messu klukkan sex áður en ég fer uppá Álftanes til mömmu og pabba. Þá fæ ég jólaandann beint í æð eftir allan hasarinn á aðventunni. Mig langar hinsvegar að læra að gera laufabrauð; ef að það er pláss í einhverjum laufabrauðsklúbbi á næstu aðventu þá má endilega hringja í mig.“