Bjarni: Fannst CS:GO vera verri útgáfa af Call of Duty

Það er hinn 21 árs Bjarni Þór Guðmundsson, eða bara Bjarni, sem situr fyrir svörum þessa vikuna. Bjarni er búsettur í Hafnarfirði og stundar nám í tölvunarfræði við Háskóla Íslands. Á sínum yngri árum bjó Bjarni í Texas og á að eigin sögn að minnsta kosti 13 kúrekahatta. Þegar kemur að CS:GO lék hann áður með meisturum Dusty en er nú leikstjórnandi hins unga og spennandi liðs NÚ.

Hvaðan kemur leiknafnið?

Það segir sig pínu sjálft haha.

Uppáhalds vopn?

Deiglan, getur gjörbreytt roundi með $700.

Hversu mikið spilar þú CS:GO?

Það er mjög misjafnt, en að jafnaði kannski 15klst í viku. Það var miklu meira áður en ég byrjaði í háskóla. Þá var algengt að ég væri í 35-40klst á viku.

Hvernig atvikaðist það að þú fórst að spila CS:GO?

Ég byrjaði í nóvember 2015 þegar grunnskóla félagar mínir fengu mig til að kaupa leikinn. Ég man eftir að segja bara að þetta væri verri útgáfan af Call of Duty.

Hvaða leikmanns lítur þú mest upp til?

Líklega blameF í Astralis, Karrigan í Faze eða Zero í Sinners. Allir af mjög mismunandi ástæðum.

Hvernig kemur þú þér í gírinn fyrir leiki?

Jáá, það er eiginlega trúarbragð hjá mér að vera búinn í sturtu áður en ég byrja að spila á daginn. Það er eini svona fasti liðurinn en svo eru auðvitað eru hlutir eins og að vera búinn að borða vel, og helst vera búinn að hreyfa mig fyrr um daginn.

Hvað er það skrýtnasta sem þú hefur lent í í CS:GO?

Þegar ég var í leik og það kom jarðskjálfti og skjárinn minn datt af borðinu.

Uppáhalds leikur fyrir utan CS:GO:?

Oldschool Runescape.

Hvernig finnst þér best að slappa af?

Kannski bara að spila óalvarlegan CS eða tefla.

Áhugamál utan rafíþrótta?

Skák, lyftingar og hlaup.

Horfir fjölskyldan þín á leikina?

Já, allavega þá stærstu.

Næsti leikur Bjarna með NÚ fer fram næsta fimmtudag klukkan 20:30 þegar liðið mætir Þór.