Arsenal og Manchester City ná samkomulagi um kaupin á Jesus

Romano greinir frá þessu á Twitter-síðu sinni, en þar kemur fram að Arsenal borgi 45 milljónir punda fyrir framherjan. Það samsvarar rúmlega 6,3 milljörðum íslenskra króna.

Brassinn hefur veriðeftirsóttur af liðum í Lundúnum, en ef marka má hina ýmsu sparkspekinga höfðu erkifjendur Arsenal í Tottenham einnig áhuga á því að fá Jesus í sínar raðir. Jesus hefur sjálfur sagst vilja spila í Meistaradeildinni - eitthvað sem hann fengi hjá Tottenham - en í hvíta hluta norður Lundúna yrði hann að öllum líkindum varamaður fyrir Harry Kane.

Jesus gekk í raðir Manchester City árið 2017 frá Palmeiras í heimalandinu. Síðan hann gekk í raðir City hefur hann skorað 58 mörk í 159 deildarleikjum. Þá á hann einnig að baki 56 leiki fyrir brasilíska landsliðið þar sem hann hefur skorað 19 mörk.