Óvæntar stjörnur Olís-deildarinnar

Einar Bragi Aðalsteinsson, HK

Fyrir tímabilið og fram í nóvember vissu ekki margir nema kannski allra hörðustu handboltaáhugamenn hver Einar Bragi Aðalsteinsson var. En strákurinn hefur á nokkrum mánuðum stimplað sig hressilega inn í Olís-deildina. Þrátt fyrir að hafa aðeins spilað ellefu leiki er Einar Bragi markahæstur í liði HK með 68 mörk. Fimmtán þeirra komu í eftirminnilegum leik gegn ÍBV í Vestmannaeyjum. Einar Bragi er mikil skytta, með góð skot, bæði af gólfi og með uppstökkum, og þar fyrir utan hörku varnarmaður. Frammistaða hans hefur vakið athygli og FH hefur krækt í kauða. Hann verður því áfram í Olís-deildinni á næsta tímabili.

Benedikt Gunnar Óskarsson, Val

Maður kemur ekki alltaf í manns stað en gerir það oftast hjá Val. Benedikt Gunnar Óskarsson hefur verið viðloðandi meistaraflokk Vals á undanförnum árum en loksins fengið alvöru tækifæri í vetur. Og hann hefur gripið gæsina með glæsibrag. Benedikt er bæði marka- og stoðsendingahæstur Valsmanna í vetur með 69 mörk og sextíu stoðsendingar. Þrátt fyrir að vera hálfgerð písl aftrar það Benedikt lítið enda með afburða leikskilning og tækni sem fæstir leikmenn Olís-deildarinnar búa yfir. Það verður afar gaman að fylgjast með Benedikt í framhaldinu og sérstaklega á stóra sviðinu í úrslitakeppninni.

Jóhannes Berg Andrason, Víkingi

Jóhannes Berg Andrason lét mikið að sér kveða með Víkingi í Grill 66 deildinni á síðasta tímabili og hefur haldið uppteknum hætti í Olís-deildinni í vetur. Er markahæstur Víkinga með 75 mörk og hefur ekki síður vakið athygli fyrir vasklega framgöngu í vörninni. Jóhannes er með flestar löglegar stöðvanir allra leikmanna í Olís-deildinni, eða 92. Skotnýtingin mætti vera betri og töpuðu boltarnir færri en Jóhannes hefur sýnt að hann á svo sannarlega heima í deild þeirra bestu. Ólíklegt er að Víkingar verði þar á næsta tímabili en Jóhannes hefur alla burði til þess.

Brynjólfur Snær Brynjólfsson, Haukum

Fellur ekki í flokkinn ungir og efnilegir enda á 29. aldursári og búinn að spila í meistaraflokki í um áratug. En það er kannski fyrst í vetur sem kastljósið hefur verið á Brynjólfi Snæ Brynjólfssyni. Og það verðskuldað enda er hann að spila sitt allra besta tímabil á ferlinum. Afar áreiðanlegur leikmaður, nýtir færin sín einkar vel og er öruggur á vítalínunni. Brynjólfur er mikill keppnismaður og ein styrkasta stoð Hauka, félagsins sem hann hefur alla sín tíð spilað með.

Ólafur Brim Stefánsson, Gróttu

Arnar Daði Arnarsson, þjálfari Gróttu, gerði vel þegar hann fékk Ólaf Brim Stefánsson til félagsins frá Val. Hann hefur reynst Seltirningum vel og er einn allra mikilvægasti leikmaður þeirra. Ólafur er mjög öflugur varnarmaður og er í risastóru hlutverki þar. Er einnig fínasti sóknarmaður og leysir það mjög vel að spila hægra megin fyrir utan þrátt fyrir að vera rétthentur. Er næstmarkahæsti leikmaður Gróttu á tímabilinu með 64 mörk. Besti leikur Ólafs kom gegn Aftureldingu í Mosfellsbænum þar sem hann skoraði ellefu mörk.

Starri Friðriksson, Stjörnunni

Ekkert lið í Olís-deildinni er jafn vel sett með örvhenta hornamenn og Stjarnan en Patrekur Jóhannesson getur valið á milli þeirra Leós Snæs Péturssonar og Starra Friðrikssonar í þá stöðu. Sá síðarnefndi er enginn nýgræðingur en er kannski fyrst núna að fá almennilega athygli, ekki ósvipað og Brynjólfur Snær. Starri var sérstaklega öflugur framan af tímabili en meiðsli hafa sett strik í reikning hans að undanförnu. Starri er með mikinn stökkkraft og frábæra skottækni. Hefur skorað 43 mörk í ellefu leikjum í Olís-deildinni og er með fína skotnýtingu. 

Sigurjón Guðmundsson, HK

Sigurjón Guðmundsson stimplaði sig strax inn í Olís-deildina með flottri frammistöðu gegn KA í 1. umferðinni. Hefur staðið sig með prýði á sínu fyrsta tímabili í efstu deild. Sigurjón á ekki langt að sækja markvarðahæfileikana enda sonur Guðmundar Hrafnkelssonar, leikjahæsta landsliðsmanns Íslands frá upphafi. Sigurjón er með 30,3 prósent hlutfallsmarkvörslu í Olís-deildinni sem ekki stórkostlegt en hefur átt marga góða leiki og sýnt að hann á heima í efstu deild. Spurningin er hvort eitthvað af hinum liðunum í Olís-deildinni reyni að krækja í Sigurjón í sumar því fátt bendir til annars en HK leiki í Grill 66 deildinni á næsta tímabili. 

Arnór Snær Óskarsson, Val

Þrátt fyrir mikil meiðsli, eins og oft áður, hafa Valsmenn ekki slegið margar feilnótur á tímabilinu. Það er ekki síst vegna traustra liðsmanna eins og Arnórs Snæs Óskarssonar. Er næstmarkahæstur hjá Val á tímabilinu með 64 mörk og frábæra 74,4 prósent skotnýtingu. Afar góður sóknarmaður og reddar sér á varnarhelmingnum. Miðað við frammistöðuna í vetur er Arnór jafnvel kominn fram fyrir Agnar Smára Jónsson í goggunarröð hægri skytta Vals.

Jón Bjarni Ólafsson, FH

Jón Bjarni Ólafsson tilheyrir sjaldgjæfri tegund, örvhentum línumönnum. Eftir að hafa verið í aukahlutverki hjá FH undanfarin ár hefur Jón Bjarni spilað mikið í vetur og staðið undir aukinni ábyrgð. Stór og mikill, gerir sitt í sókn og er mjög öflugur í vörninni. Á stóran þátt í því að ekkert lið hefur fengið á sig færri mörk í Olís-deildinni í vetur en FH (25,1). Sigursteinn Arndal, þjálfari FH, er í öfundsverðri stöðu með tvo hörkulínumenn, Jón Bjarna og Ágúst Birgisson.

Allan Norðberg, KA

Fyrir áramót fékk Allan Norðberg afar fá tækifæri í hægra horninu, enda í samkeppni við Óðin Þór Ríkharðsson, en eftir áramót hefur hann öðlast nýtt líf sem skytta. Einar Rafn Eiðsson hefur verið meiddur undanfarnar vikur en Allan hefur séð til þess að hans hefur ekki verið saknað um of. Færeyingurinn hefur skorað þrettán mörk og gefið tíu stoðsendingar í þremur deildarleikjum og níu mörk í tveimur leikjum á árinu 2022. Eftir erfiðan kafla hefur KA náð vopnum sínum og Allan á ekki lítinn þátt í því. Áhugavert verður að sjá hvernig Jónatan Magnússon, þjálfari KA, notar Allan þegar Einar Rafn snýr aftur.