Ágústa Ýr í myndatöku fyrir Vogue: „Litla ég væri mjög stolt“

Ágústa Ýr hefur tekið þátt í ýmsum spennandi verkefnum undanfarin ár og má þar meðal annars nefna Feneyjatvíæringinn, unnið að hinum ýmsu tónlistarmyndböndum og gengið á tískusýningu fyrir merkið Fenty sem ofurstjarnan Rihanna rekur. Blaðamaður setti sig í samband við þessa fjölhæfu listakonu og fékk að heyra um verkefnið með Vogue.

Tískusýning leiddi af sér tækifærið

Samkvæmt Ágústu varð þessi spennandi myndataka að raunveruleika eftir að hún gekk á tískupalli fyrir tískumerkið Adriana Hot Couture í Mílanó í september síðastliðnum.

„Í kjölfarið heyrðu þau í mér fyrir þessar tökur og vildu endilega að ég kæmi til Mílanó aftur fyrir þetta,“ segir Ágústa en þetta er þó ekki í fyrsta skipti sem hún vinnur með tískurisanum Vogue. Árið 2020 vann hún verkefni fyrir Vogue Italia og Gucci en nú var hún í fyrsta skipti að vinna með tímaritinu sem fyrirsæta.

Það er eflaust draumur margra að sjá mynd af sér í Vogue og því varð blaðamaður að spyrja hvernig Ágústu hefði liðið í kjölfarið.

„Þetta er náttúrulega bara klikkuð tilfinning. Ekki það að eg hafi haldið að þetta myndi aldrei gerast per say, en að sjá þetta rætast er alveg amazing.

Litla ég væri mjög stolt og að fríka út.“

Leiðin liggur til Ameríku

Það er ýmislegt spennandi á döfinni hjá Ágústu í hinum skapandi heimi.

„Ég er að vinna í nokkrum verkefnum núna, meðal annars einu fyrir Indie K-Pop hljómsveit sem er mjög spennandi þar sem ég hef lengi viljað koma mér þangað inn. Ég er svo bara að halda áfram í því sem ég er að gera og reyna að koma mér aftur til Ameríku,“ segir Ágústa sem bjó meðal annars í New York í nokkur ár og lærði ljósmyndun í School of Visual Arts. Nýlega hefur hún einmitt enduruppgötvað ástríðu sína fyrir ljósmyndunum.

„Mig langar líka að byrja að taka ljósmyndir aftur. Ég tók nýlega myndir af söngkonunni Kim Petras sem eru ekki enn komnar út en ég var búin að gleyma því hvað mér finnst gaman að taka myndir,“ segir Ágústa Ýr að lokum.