Silfurtónar fá nýtt líf í Verbúðinni

Steinar Fjeldsted skrifar 7. febrúar 2022 16:01

Þjóðin er límd við imbakassann alla sunnudaga og horfir á vinsælustu sjónvarpsseríu okkar Íslendinga, Verbúðina. Þættirnir eru einstaklega vel heppnaðir og er virkilega gaman að sjá hið Íslenska líf á níunda áratugnum. Höfundar þáttanna eru þau Nína Dögg Filippusdóttir Gísli Örn Garðarsson og Björn Hlynur Haraldsson en Mikael Torfason er meðhöfundur.

Þættirnir fanga stemninguna fullkomlega en tónlistin spilar þar feyki stórt hlutverk. Margar gleymdar perlur fá að hljóma í eyrum landsmanna en í síðasta þætti mátti heyra lagið Töfrar með hljómsveitinni Silfurtónum. Silfurtónar var virkilega skemmtileg sveit með húmorinn í lagi en það var tónlistarmaðurinn og leikarinn Magnús Jónsson sem leiddi sveitina. Magnús Jónsson þakkar fyrir sig á Facebook síðu sinni og segir:

„Takk Verbúð og Vesturport fyrir að gera einhverja skemmtilegustu og ferskustu seríu Íslandssögunnar og gefa okkur gamlingjunum í Silfurtónum séns að fá að taka þátt í þessu fallega ævintýri. Ykkar er sóminn, okkar er lotningin.”

Þættirnir eru stútfullir af frábærri tónlist, sannkölluðum Íslenskum perlum. Hér fyrir neðan er hægt að hlusta á playlista með allri tónlistinni úr Verbúðinni.

Þessi grein birtist fyrst á Albumm.is. Albumm var stofnaður árið 2014 og fjallar um íslenska tónlist og menningu frá öllum hliðum. Hægt er að hafa samband í albumm@albumm.is.

Tónlist