Bríet frumsýnir Cold Feet og nýtt tónlistarmyndband

Lagið kemur út á miðnætti í kvöld inn á allar helstu streymisveitur. Hér má hlusta á lagið á Lífinu á Vísi ásamt tónlistarmyndbandinu:

Myndbandið er í senn hrátt, einlægt og kraftmikið þar sem Bríet er stödd í glerboxi í kuldanum umkringd fjalllendi. Tökur fóru fram veturinn 2019 á stysta degi ársins sem blandast vel inn í angist textans, þar sem Bríet syngur meðal annars um að ætla ekki að hinkra við ef manneskjan sem hún elskar er eitthvað efins.

Tilfinningin í laginu er innilokunarkennd

Bríet hefur beðið lengi eftir að gefa lagið út og í viðtali við blaðamann Vísis segist hún hafa farið í gegnum allan tilfinningaskalann í tengslum við það:

„Ég er búin að sitja á þessu efni í þrjú ár núna og hef flakkað á milli þess að elska lagið, fundist það fáránlega lélegt, elskað það aftur og meira en ég gerði áður, ekki viljað gefa það út og farið svo sama hringinn í gegnum allar þessar tilfinningar aftur og aftur. Svo þetta ástarsamband mitt við þetta lag og tónlistarmyndband er nú loks að verða opinbert og fólk fær að njóta með.“

Lagið er samið af Bríeti sjálfri og Pálma Ragnari Ásgeirssyni og við undirbúning myndbandsins fékk Bríet til liðs við sig öflugan hóp skapandi fólks.

„Ég vildi að myndbandið myndi lýsa tilfinningunni í laginu. Innilokunarkennd. Ég byrjaði hugmyndavinnuna með Álfheiðu mörtu og Svanhildi Grétu sem þróaðist í það að ég og Kristinn Arnar, krassasig, gerðum myndbandið.“

Mikilvægt að vinna hratt við krefjandi aðstæður

„Það var alveg hreint ótrúlegt að fylgjast með þessu öllu saman ganga upp því aðstæður voru virkilega erfiðar. Við höfðum fjögurra tíma ramma til þess að taka myndbandið upp á stysta degi ársins,“ segir Bríet og bætir við að mikill tími hafi farið í að hanna og búa til glerkassann sem og að fara í gegnum hvern einasta ramma úr myndbandinu. 

Óviðráðanlegur kuldi spilaði svo veigamikið hlutverk í tökunum. „Ég man enn þá eftir því hversu kalt það var að vera í þessum kassa fullum af köldu vatni í fjóra tíma.

En mikið var þetta allt þess virði og, eins og skáldið segir, hvað gerir maður ekki fyrir listina?“