Grímsá á leið í útboð

Ein af vinsælli laxveiðiám landsins er Grímsá í Borgarfirði og það er mikil eftirsókn eftir leyfum í hana bæði af innlendum og erlendum veiðimönnum.

Hreggnasi ehf hefur verið með ánna á leigu frá 2004 sem þykir langur tími í þessu sambandi en veiðifélag Grímsár hefur engu að síður tekið þá ákvörðun um að fara með ánna í útboð og sækist eftir samningi til fimm ára frá og með sumrinu 2022. Það hefur verið sterkur fastkúnna hópur erlendra veiðimanna í Grímsá og spurning hvort sá hópur komi til með að halda tryggð við ánna ef annar leigutaki tekur við henni. 

Grímsá er laxgeng 32 km og heldur vatni afar vel á þurrkaárum. Í ánni veiðist bæði lax og sjóbirtingur og er haustveiðin í henni oft sá tími sem stærstu laxarnir á vesturlandi eru að koma á land. Það er ekkert skrítið að hún sé vinsæl og það má ekki reikna með öðru en að það verði slegist um hana hjá leigutökum nú þegar loksins menn sjá fram á að erlendir veiðimenn gætu verið að streyma til landsins aftur.