Sleit krossband nýbúin að skrifa undir fyrsta atvinnumannasamninginn

Leikstjórnandi Valsliðsins verður ekkert meira með Hlíðarendaliðinu á leiktíðinni eftir að hafa slitið krossband í leik með 3. flokki félagsins.

Handbolti.is segir frá þessu og að Ásdís Þóra hafi nú fengið staðfestingu á alvarleika meiðslanna sem þýðir að tímabilið er búið hjá henni.

Ágúst Þór Jóhannsson, þjálfari Vals og faðir Ásdísar Þóru, staðfesti fregnirnar við handbolta.is og hann sagði að það skýrðist á allra næstu dögum hvenær Ásdís Þóra kemst í aðgerð en vonir standa til að það verði sem fyrst eftir páska.

Ásdís Þóra skrifaði á dögunum undir samning við sænska félagið Lugi. „Hún er óslípaður demantur sem mun passa fullkomlega inn í okkar unga og efnilega lið,“ er haft eftir Kenneth Andersson, þjálfari Lugi á vef félagsins. Svíarnir vilja enn fá hana til sín þrátt fyrir meiðslin.

„Forráðamenn Lugi styðja hana hundrað prósent enda horfa þeir til hennar sem framtíðarleikmanns hjá félaginu,“ sagði Ágúst Þór við handbolta.is.

Þetta hefur verið allt annað en auðvelt tímabil fyrir Ágúst Þór og Valsliðið en liðið hefur misst út marga leikmenn, bæði í meiðsli og barnsburðarleyfi.

Ásdís Þóra, sem er fædd í mars árið 2002, er með 2,0 mörk og 0,8 stoðsendingar í leik með Valsliðinu í Olís deildinni á þessu tímabili en var með 2,9 mörk og 1,4 stoðsendingar að meðaltali í fyrra.