Björgvin yfirgefur Hauka í sumar

Björgvin er í hálfu starfi hjá Haukum. Hann er leikmaður, markmannsþjálfari og í markaðsstörfum en Björgvin vill finna sér lið þar sem hann getur verið markmaður í fullu starfi.

„Við sýnum Björgvini fullan skilning á hans stöðu. Við munum í sameiningu gera allt til að ná sem bestum árangri í vetur og ná okkar markmiðum þannig að við getum kvatt sáttir,“ sagði Þorgeir Haraldsson, formaður handknattleiksdeildar Hauka.

„Þetta var gríðarlega erfið ákvörðum en eitthvað sem ég þarf að gera. Ég og fjölskyldan mín erum með okkar bækistöð inn í Reykjavík. Ég vil geta haft meiri tíma fyrir fjölskylduna og verið í félagi þar sem börnin mín alast upp þannig að við getum átt það saman,“ sagði Björgvin sjálfur.

Björgvin gekk fyrst í raðir Hauka árið 2017 en stoppaði stutt við þar sem hann fór til Skjern í Danmörku. Hann snéri svo aftur heim síðasta sumar og samdi aftur við Hafnarfjarðarliðið.

„Ég er ótrúlega þakklátur Haukum fyrir þeirra fagmennsku og skilning en þessi ákvörðun hefur lítið með Hauka að gera enda hefur félagið ávallt stutt vel við bakið á mér í einu og öllu, en það er einmitt þess vegna sem að þessi ákvörðun var svona erfið. Minn draumur er að geta skilið sáttur við liðið í sumar og að við sem lið verðum þá búnir að koma Haukum á þann stall sem þeir eiga heima á,“ bætti hann við.

Olísdeildirnar í handbolta eru á Stöð 2 Sport en upplýsingar um útsendingar má finna hér. Olísdeildin er hluti af Stöð 2 Sport Ísland sem kostar 3.990 krónur á mánuði en einnig má kaupa útsendingar sem stakan viðburð á 990 krónur.