Dusty fór hamförum

Tíunda umferð Vodafonedeildarinnar í CS:GO fór fram í kvöld. Lokaleikur kvöldsins var toppliðið Dusty gegn nýliðum deildarinnar Exile. Lið Exile var á heimavelli og völdu þeir kortið Mirage.

Stórmeistarar Dusty mættu einbeittir til leiks. Eftir jafna fyrstu lotu þar sem dýrkeypt mistök Exile færðu Dusty lotuna fór lið Dusty á flug. Þar sem EddezeNNN (Eðvarð Þór Heimisson) fór fremstur í sóknarleik Dusty runnu þeir í gegnum varnir Exile líkt og heitur hnífur í gegnum smjör.

Þrátt fyrir að ganga vandaðir til verks féll fátt með liði Exile og komust þeir ekki á blað fyrr en í 14.lotu í leikhluta sem Dusty átti skuldlaust.

Staðan í hálfleik Dusty 13 - 2 Exile.

Sigurganga Dusty hélt áfram í upphafi seinni hálfleiks þegar varnarleikur þeirra tók við. Fljótt fundu Exile þó glufur á vörninni og nýttu þeir þau tækifæri sem þeir fengu gífurlega vel. Exile náði tveimur lotum og setti þannig efnahaginn hjá Dusty úr skorðum. Dugði magur fjárhagur þó ekki til að stöðva lið Dusty, með ótrúlegri spilamennsku opnaði StebbiC0C0 (Stefán Ingi Guðjónsson) vörn Exile og felldi fjóra af leikmönnum Exile einungis vopnaður deiglu (skammbyssa - deagle). Færði þetta framtak Stefáns Dusty sigurlotuna á silfurfati.

Lokastaðan Dusty 16 - 4 Exile.