Hetja Man Utd: Snýst um að setja boltann í markið, ekki stangirnar

Portúgalinn Bruno Fernandes reyndist hetja Manchester United í dag þegar hann skoraði sigurmarkið með síðustu spyrnu leiksins í 2-3 sigri gegn Brighton.

„Við gáfum þeim alltof mikið pláss til að spila. Við vorum ekki nógu ákveðnir. Við gefum þeim tvö mörk og við verðum að gera miklu betur,“ sagði Bruno Fernandes í leikslok.

Brighton var sterkari aðilinn í leiknum og átti meðal annars þrjú skot í tréverkið.

„Brighton gerði mjög vel en kannski af því að við vorum ekki jafn aggressívir og við eigum að vera. Við verðum að vinna fleiri bolta, pressa betur og tapa boltanum sjaldnar,“

„Kannski áttu þeir meira skilið en leikurinn gengur út á að skjóta í markið, ekki í stangirnar. Stundum verður maður að hafa heppnina með sér í liði,“ sagði Bruno.