Fyrstu laxarnir komnir á land úr Norðurá

Norðurá opnaði í morgun með pomp og prakt en mikil eftirvænting er jafnan eftir opnun hennar sem yfirleitt slær taktinn fyrir komandi sumri.

Það verður ekki sagt annað en að Norðurá hafi tekið vel á móti opnunarhollinu en þegar þetta er skrifað höfum við aðeins náð sambandi við eina stöng og þar er Nuno Alexandre að setja í hvern fiskinn á fætur öðrum og er kominn með fjóra laxa á land í morgun ásamt makkernum sínum. Fyrsti laxinn sem hann tók í morgun var á micro hitch sem segir manni að það séu topp aðstæður við ánna núna. Af þessum fjórum löxum eru tveir vel haldnir eins árs laxar sem gefur vonandi til kynna að aðstæður í sjó hafi verið laxinum góðar og afföll lítil. Þetta er einstaklega vel mannað opnunarholl í Norðurá skipað mönnum sem þekkja hana vel og eiga væntanlega eftir að bæta vel í tölurnar þegar líður á daginn. Við bíðum spennt fregna eftir veiðitölum í lok dags.