Sama mantran í 40 daga, ísköld sturta og stórstjörnur

Við sjáum hana í fjölmiðlum á haustin nánast eins og fastan punkt í tilverunni. Þá mætir hún í fjölmiðlaviðtöl og segir frá því helsta sem væntanlegt er á alþjóðlegu kvikmyndahátíðinni RIFF. Þegar hátíðin er haldin flykkjast Íslendingar í bíó í ellefu daga samfleytt til að sjá það nýjasta nýtt í alþjóðlegri kvikmyndagerð. Já í kaffispjalli helgarinnar er það Hrönn Marinósdóttir framkvæmdastjóri RIFF kvikmyndahátíðarinnar sem situr fyrir svörum. Hún segir okkur meðal annars frá því að í vinnunni gefast stundum tækifæri til að hitta stórstjörnur og einstaka vinnudaga horfir hún á bíómyndir allan daginn. Sjálf innsiglar hún hvern dag með möntru, jógatrixi og góðum kaffibolla.

Í kaffispjalli um helgar spyrjum við alltaf um það hvenær fólk vaknar á morgnana, hvað er það fyrsta sem það gerir þá og hvenær fólk fer að sofa. Við spyrjum líka um vinnuna, skipulagið og helstu verkefnin.

Hvenær vaknar þú á morgnana?

„Ég bý við þann lúxus að eiga þrjár sjálfstæðar unglingsdætur sem vakna núorðið sjálfar á morgnana til að fara í skólann.  Þær vilja helst vera lausar við að ég sé eitthvað að stússast í þeim svo ég get oft lúrað aðeins lengur eða til sirka átta. Mér finnst voða gott að kúra  aðeins á morgnana.“

Hvað er það fyrsta sem þú gerir á morgnana?

„Ég reyni frá þeirri stund sem ég vakna að vera meðvituð um að koma góðum hugsunum að og ákveð strax að þetta verði góður dagur.

Mér finnst gott að hugleiða á morgnana, þá tek ég 11 mínútur í að fara með möntru, ég reyni að halda sömu hugleiðslunni í 40 daga í röð.

Þegar það liggur sérlega vel á mér fer ég ískalda sturtu á morgnana því þá er eins og líkaminn allur lifni við og það kviknar jafnvel á perum í heila sem hefur verið slökkt á lengi. Þetta er jógatrix. Ég byrja á að bursta ég líkamann með mjúkum bursta, ber síðan á mig góða möndluolíu og fer síðan hægt og rólega undir kalt vatn, fyrst með útlimi og svo er það örsnöggt, köld buna yfir allan líkamann nema ekki höfuðið. Eftir svona meðferð er maður til í allt!

Ég er kaffikona og finnst það ómissandi á morgnana. Ég set ghee í espresso kaffið mitt og nýt þess síðan að renna yfir blað dagsins og helstu netmiðla á meðan ég sötra á kaffinu mínu og borða hafragrautinn.“

Mikilvægt að halda ró sinni í öllum aðstæðum

Vinnudagar Hrannar eru fjölbreyttir og ólíkir en hún segir að því eldri sem hún verður því mikilvægara finnst henni að halda ró sinni í öllum aðstæðum. Margt getur farið úrskeiðis þegar stór viðburður er skipulagður en stundum fylgir vinnunni líka tækifæri til að hitta frægt fólk.

Ertu vön að fara oft í bíó eða er kvikmyndaáhuginn meira bundinn við vinnutengd verkefni og RIFF? 

„Mér finnst mjög gaman að fara í bíó og geri talsvert af því en horfi líka mikið  á myndir sem við fáum sendar víða að frá kvikmyndagerðarmönnum sem vilja fá að sýna myndirnar sínar á RIFF.  Þega nálgast umsóknarfrest mynda þá hef ég góða afsökun til þess að horfa á bíó allan daginn. Ekki leiðinlegt.“

Í hvaða verkefni ertu að vinna helst í þessa dagana?

„Ég er nýkomin heim frá Berlinale  sem er ein stærsta hátíðin í Evrópu. Þar var ég meðal annars að taka viðtöl við fólk sem hefur áhuga á að koma að vinna með okkur á RIFF og var í samtali við  starfsfólk kvikmyndastofnana, dreifingaraðila mynda og félaga á öðrum  kvikmyndahátíðum sem við vinnum með auk þess sem  ég skellti mér á nokkrar myndir.

Var að vonast til þess að rekast á hjartaknúsarann Jeremy Irons sem situr í dómnefnd eða  jafnvel Hillary Clinton sem var að kynna nýja seríu um sig sjálfa.  Úr því varð ekki að sinni en ég hitti stórstjörnuna Hildi Guðnadóttur sem var mikill heiður, það er ekki lítið sem sú unga kona hefur náð að áorka, mikil fyrirmynd.

Þessa dagana erum vinna í að ráða gott og skapandi fólk til að vinna með okkur að næstu hátíð og jafnframt erum við komin á fullt í dagskrárgerð. Vinnan bakvið tjöldin felst  mikið í að leita til samstarfsaðila; viðhalda tengslum við  þá sem hafa unnið með okkur lengi svo sem TVG Zimsen, Hertz og RÚV og finna ný fyrirtæki, stofnanir og einstaklinga sem vilja taka þátt í að byggja upp RIFF sem  stærsta kvikmyndaviðburðinn hérlendis. Minn tími fer líka þó nokkuð í að vera í góðu samtali við opinbera aðila hjá borg og ríki. Mikilvægt er að allir upplifi að RIFF er samfélagslegt verkefni sem margir ólíkir hafa hag af að sé til.

Við erum líka að fara útbúa mjög spennandi  kynningarefni í samvinnu við Aldeilis auglýsingastofuna sem ætlunin er að kynna á erlendum hátíðum.“

Hvernig skipuleggur þú þig í vinnu?

„Ég er nýbyrjuð að vinna með  OneNote og Trello. Ég nota Slack í samskiptum við starfsmenn RIFF og Google docs yfir helstu skjöl. Ég nota alls konar To do lista.

Ég skipulegg líka líkamsæfingar inn í daginn minn, því ef ég er dugleg að hreyfa mig þá hef ég  miklu meiri orku í vinnunni.  Ég er mikið í útiíþróttum svo sem hlaupum og gönguskíðum en er líka að hjóla og lyfta.

Það er oft mjög mikið að gera í vinnunni og þrátt fyrir gott skipulag er margt sem getur farið úrskeiðis þegar maður rekur svona stóran viðburð, þá finnst mér mikilvægast eftir því sem ég eldist að reyna að halda ró minni, sama hvað gengur á og það að vera í góðu líkamlega og formi hjálpar svo sannarlega.“

Hvenær ferðu að sofa á kvöldin?

„Markmiðið er að ná alltaf sjö til átta tímum.  Svefn er eitt það mikilvægasta í því að halda góðri heilsu. Er oftast farin a ð sofa um eða í kringum miðnætti en oftast er markmiðið að sofna fyrir tólf.“