Fréttafíkill sem hjólar, syndir eða æfir á kvöldin og elskar Hornstrandir

Sigríður Hallgrímsdóttir, eða Sirrý eins og hún er að jafnaði kölluð, er verkefnastjóri hjá Alva sem veltir því fyrir sér á hverjum morgni hvort hún væri hamingjusamari ef hún kæmi sér af stað í ræktina klukkan sjö. Þess í stað snúsar hún í hálftíma og æfir á kvöldin. Hún styðst við To do lista í skipulagi og þrífst best í nýsköpunarumhverfi. Þessa dagana vinnur hún að áræðanleikakönnun en segir mörg verkefni í gangi hjá fyrirtækinu. 

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefni.

Hvenær vaknar þú á morgnana?

„Ég vakna um sjö og snúsa til hálf átta. Ég er alltaf að vonast eftir því að einn daginn vakni ég sem týpan sem fer í ræktina, fer svo heim að laga til og svo búin að öllu áður en hún mætir í vinnuna. Það hefur aldrei gerst. 

Ég er týpan sem vakna klukkan sjö og snúsa í hálftíma á meðan ég hugsa hvort ég yrði nokkuð hamingjusamari ef ég væri hin týpan.“

Hvað er það fyrsta sem þú gerir á morgnana?

„Þegar ég svo stíg fram úr rúminu þá halda mér engin bönd. Ég er fréttafíkill þannig að ég byrja á því að kveikja á öllum miðlum, henda hafragrautnum í pott og undirbúa töfradrykkinn, drykkur sem ég hannaði sjálf og inniheldur alla heimsins orkugjafa. Ég er að taka Landvættina þetta árið og er í mjög ströngu æfingarprógrammi. Morgunmaturinn er því afar mikilvægur.“

Gætir þú nefnt einhvern einn stað sem þér finnst fallegasti staðurinn á Íslandi?

„Ég held að Hornstrandirnar séu fallegasti staðurinn. Ég tilheyri gönguhóp sem heitir því frumlega nafni „Gönguhópurinn“ og við höfum gengið þarna um árlega frá 2007, skoðað hvert strá, velt við hverjum steini og rölt upp allar hæðir. Það eru eiginlega ekki til orð til að lýsa náttúrunni og fegurðinni. Refir vappandi um og fuglalífið með eindæmum fjölbreytt. Svo ekki sé nú talað um útsýnið og fegurðina þegar maður stendur upp á til dæmis Hornbjargi eða Straumnesfjalli. Þetta er bara ólýsanlegt.“

Í hvaða verkefni ertu að vinna helst í þessa dagana?

„Það hentar mér mjög vel að vinna í nýsköpunarumhverfi. Verkefnin eru fjölbreytt og skemmtileg. Ég hef oftast kosið að vinna hjá fyrirtækjum sem eru að ryðja nýja braut og jafnvel brjóta upp það gamla. Það eru þesskonar fyrirtæki sem skapa áhugaverð, ný og verðmæt störf.

Ég er í dag að vinna að áreiðanleikakönnun ásamt ýmsum öðrum spennandi verkefnum. Það er allt að gerast hjá okkur þessa dagana.“

Hvernig skipuleggur þú þig í vinnu?

„Það er ekki flókið að segja frá, ég nota to-do lista. Ég set upp to-do lista yfir daginn og reyni að fylgja honum eftir. Til þessa nýti ég mér að sjálfsögðu nýjustu tækni og vísindi. 

Þegar ég er með mörg verkefni í gangi í einu þá úthluta ég ákveðna daga fyrir ákveðin verkefni. 

En auðvitað þarf maður að vera sveigjanlegur. Mikilvægast er að koma málum áfram og klára þau.“

Hvenær ferðu að sofa á kvöldin?

„Það er frekar misjafnt. Líklega oftast milli ellefu og eitt. Ég hjóla, syndi eða æfi oft á kvöldin þannig að þegar ég kem heim er ég að springa úr orku, þá finnst mér gott að hlusta á hljóðbók eða slaka á yfir Netflix þætti áður en ég sofna.“