Renualt Kangoo og Master koma sem rafknúnir vetnisbílar

Renault Groupe hefur ákveðið að hefja framleiðslu á sendibílunum Kangoo og Master í rafknúnum vetnisútfærslum til viðbótar þeim orkugjöfum sem þegar eru í boði. Þannig mun Kangoo Z.E. Hydrogen koma á markað fyrir árslok og Master Z.E. Hydrogen á næsta ári, 2020.

Að sögn tæknisérfræðinga franska framleiðandans mun drægni rafknúnu vetnissendibílanna aukast verulega umfram drægni hreinu rafbílanna af sömu gerð auk þess sem áfyllingartími þeirra styttist umtalsvert.

Breytingarnar eru einkum gerðar með þarfir atvinnubílamarkaðarsins í Evrópu í huga. Rafknúna vetnistæknin hefur verið í prófunum hjá Renault síðan 2014 í samstarfi við Symbio, dótturfyrirtæki Michelin.

Í rafknúnum vetnisútfærslum verður drægni sendibílanna að minnsta kosti 350 km sem einkum nýtist þeim fyrirtækjum og einyrkjum sem vilja vera á umhverfisvænum atvinnubílum á sama tíma og þeir þurfa á því að halda að komast lengri vegalengdir.

Drægni Kangoo Z.E. Hydrogen miðað við hreinu rafbílaútgáfu bílsins fer að meðaltali úr 230 km samkvæmt WLTP í um 370 km og í tilfelli Master Z.E. Hydrogen úr 120 km að meðaltali í 350 km. Renault treystir á uppbyggingu vetnisstöðva.