Svona gerir Eva Laufey kjúkling Milanese

Einfalt með Evu fór í loftið á Stöð 2 á dögunum en í þáttunum matreiðir Eva Laufey Kjaran Hermannsdóttir frábæra en á sama tíma einfalda rétti. 

Uppskriftirnar verða ávallt aðgengilegar hér á Vísi. Hér að neðan má sjá uppskrift úr þætti gærkvöldsins. Þar sýndi Eva Laufey hvernig maður reiðir fram Kjúkling Milanese. 

Kjúklingur Milanese

*Fyrir fjóra fullorðna

Stökkar kjúklingabringur

• 4 – 5 kjúklingabringur
• Salt og pipar
• Ólífuolía
• 5 – 6 dl brauðmylsna
• 2 egg
• 100 – 150 g hveiti
• 1 dl nýrifinn parmesan
• 1 stór mozzarella kúla (120 g)
• 1 sítróna
  
  
  
  Aðferð:
  
  Skerið kjúklingabringurnar í tvennt og fletjið aðeins út, með kjöthamri eða kökukefli til dæmis.
  
  Kryddið bringurnar með salti og pipar.
  
  Pískið tvö egg í skál, setjið brauðmylsnu í aðra skál og hveiti í þá þriðju. Það er svolítið erfitt að reikna hlutföllin nákvæmlega en bætið bara við ef þið þurfið.
  
  Setjið kjúklingabringu fyrst ofan í hveitið, síðan ofan í eggin og að lokum ofan í brauðmylsnuna.
  
  Hitið ólífuolíu á pönnu og steikið bringurnar í eina til eina og hálfa mínútu á hvorri hlið. Það má gjarnan krydda með meiri salti og pipar. Rífið niður parmesan yfir kjúklinginn.
  
  Setjið bringurnar í eldfast form eða á pappírsklædda ofnplötu og inn í ofn við 180°C í 15 mínútur. Bringurnar eru mjög þunnar og þurfa þess vegna ekki lengri eldunartíma.
  
  Skerið mozzarella í sneiðar og leggið ofan á hverja bringu, stillið þá ofninn á grill og eldið bringurnar áfram í um það bil mínútu eða þar til osturinn er bráðnaður.
  
  Kreistið safa úr sítrónu yfir bringurnar áður en þið berið þær fram með pasta og tómat-og basilíkusósu.
  
  Tómat-og basilíkusósa
  
  1 msk ólífuolía
  
  1 laukur
  
  2 hvítlauksrif
  
  1 krukka pastasósa með basilíku  (425 g )
  
  ½ kjúklingateningur
  
  Salt og pipar
  
  Handfylli fersk smátt söxuð basilíka
  
  Aðferð:
  
  Hitið ólífuolíu í potti, skerið lauk og hvítlauk afar smátt og steikið í smá stund.
  
  Bætið pastasósunni,  kjúklingatening og basilíku saman við og hrærið vel í sósunni. Kryddið til með salti og pipar.
  
  Lækkið hitann og leyfið sósunni að malla í nokkrar mínútur.
  
  Sjóðið spaghettí samkvæmt leiðbeiningum á pakkanum og berið fram með kjúklingabringunum.