Hergeir sveif hæst og skoraði eitt af mörkum ársins | Myndband

Hergeir Grímsson, vinstri hornamaður Selfoss í Olís-deild karla í handbolta, skoraði eitt af mörkum ársins í 31-29 sigri Selfyssinga gegn FH í gærkvöldi þegar að liðið komst í 2-1 í undanúrslitarimmu liðanna.

Sjá einnig:Varamaðurinn sem er búinn að taka yfir úrslitakeppnina

Þessi öflugi leikmaður kom Selfossi í 8-3 í fyrri hálfleik með algjörlega geggjuðu marki þegar að hann greip sendingu Sölva Ólafssonar, markvarðar heimamanna, á hæsta punkti og náði svo að klára færið í baráttu við Gísla Þorgeir Kristjánsson.

Alexander Már Egan, leikmaður Selfoss sem er á láni hjá Þrótti, líkti félaga sínum við NFL-útherjann Odell Beckham Jr. sem er þekktur fyrir að grípa boltann á ævintýralegan hátt. Alex vildi reyndar meina að Hergeir væri betri en Beckham.

Þetta ótrúlega mark má sjá í spilaranum hér að ofan en fjórði leikur liðanna fer fram í Kaplakrika á laugardaginn klukkan 19.30 og verður í beinni útsendingu á Stöð 2 Sport 2 HD.

@hergeirgrimsson > Odell Beckham Jr. #olisdeildin#handbolti@Seinnibylgjan@selfosshandb

— Alex Vegan (@alexmaregan) May 1, 2018