Fimm trend sem eru að koma aftur

Ritstjórn skrifar 7. apríl 2018 09:00

Nú þegar vorið er handan við hornið fara margir að vilja breyta til í fataskápnum, og jafnvel bæta einhverjum nýjum flíkum inn í hann. Hér eru trend sem verða áberandi í sumar, en öll þeirra höfum við séð áður, en bjuggumst hins vegar ekki við að sjá þau aftur svona fljótt.

Köflótt og samsett

Köflótt mynstur hefur verið mjög vinsælt í allan vetur en nú er það aðeins að breytast, og er það orðið litríkara og stærra. Taktu Cher úr Clueless til fyrirmyndar og farðu í samstæðar köflóttar flíkur úr skærum lit, og annaðhvort með jakka við stutt pils, eða stuttan topp við útvíðar buxur.

Sportleg sólgleraugu

Íþróttatískan sem hefur verið yfirráðandi síðustu ár hefur varla farið framhjá neinum, og nú á hún einnig við þegar kemur að sólgleraugum. Breski fatahönnuðurinn Stella McCartney kynnti nýjustu sólgleraugu sumarsins frá sínu merki og það er gleraugnastíll sem við könnumst helst við hjá þeim sem stunda íþróttir - með marglituðu speglagleri og í sportlegum stíl. Ekki verra að þessi gleraugu henta jafn vel á strætum borgarinnar sem og við allskyns útivist í sumar.

Mjög víðar gallabuxur

Mjög víðar gallabuxur er flík sem að margir óskuðu sér að sjá aldrei aftur, en þær eru komnar aftur. Danska fatamerkið Ganni kynnti nýja gallafatalínu fyrir sumarið á dögunum, þar sem við sjáum þessar buxur í allri sinni dýrð.

Krumpugallinn

Gamli góði krumpugallinn var mjög áberandi fyrir sumarið, ekki bara hjá íþróttamerkjunum heldur einnig tískuhúsum eins og Gucci og Isabel Marant. Peysan og buxurnar eru helst með stroffi að neðan, og eru úr þunnu efni sem krumpast auðveldlega. Notaðu þinn galla helst við háhælaða skó.

Höfuðfat vorsins

Þessi hattur sem kallast “bucket hat” á ensku, hefur oftast verið kenndur við hjólabrettakappa eða veiðimenn. Hins vegar var hann mjög áberandi á tískupöllunum fyrir sumarið og sérstaklega hjá tískuhúsum eins og Neil Barrett, Prada og Louis Vuitton. Trend sem bæði kynin ættu að tileinka sér sem fyrst.