Guðfaðir fönksins spilar á Secret Solstice

George Clinton ásamt Parliament-Funkadelics, Kollektiv Turmstrasse, Stuðmenn, Gus Gus, Aron Can, Reykjavíkurdætur, Valdimar, Flóni, Birnir og Joey Christ ásamt fleirum bætast við í þriðju tilkynningu Secret Solstice hátíðarinnar.

Það er komið að þriðju tilkynningu Secret Solstice og meðal þeirra sem bætast við er sjálfur guðfaðir fönksins, George Clinton, sem kemur fram ásamt hljómsveitum sínum Parliament og Funkadelics.

Það þarf vart að kynna hann fyrir Fönk áhugamönnum en hann hefur á löngum ferli gefið út fjölmargar plötur sem velflestar komast á lista yfir bestu fönk plötur allra tíma. Þekktasta lagið hans er líklega Parliament lagið Give up the funk ásamt laginu Can you get to that.

Það er 25 manna hljómsveit sem fylgir Clinton á þessu líklega síðasta tónleikaferðalagi hans og því er óhætt að lofa sannkallaðri fönk veislu í Laugardalnum þegar Clinton ásamt sínu föruneyti stíga á svið. Fyrir dansþyrsta gesti bætist við þýska tvíeykið Kollektiv Turmstrasse en skipuleggjendur hátíðarinnar hafa ósjaldan síðastliðin ár verið beðnir um að bóka þá á hátíðina. Þeir hafa átt ófáa smelli en sennilega ber þar hæst Sorry I'm Late.

Alls eru það 39 atriði sem bætast við í þessari þriðju tilkynningu og meðal annarra sem bætast við eru Gus Gus dj set, Gísli Pálmi, Birgir Hákon, Logi Pedro, Sturla Atlas, Valby Bræður og For a Minor Reflection.

Þessir listamenn bætast í frábæran hóp hljómsveita og listamanna sem þegar er búið að kynna, þar á meðal eru: Slayer, Gucci Mane, Stormzy, Bonnie Tyler, Clean Bandit, Death From Above, Steve Aoki, Jet Black Joe, 6lack, Goldink, J Hus, Charlotte de Witte, Skream, A-Trak, Masego, IAMDBB og Högna.

Þess má geta að Stormzy vann nýlega Brit verðlaunin fyrir bæði plötu ársins og karlkyns listamann ársins og skaut þar ekki ómerkari manni en Ed Sheeran ref fyrir rass. Þá er einnig orðið ljóst að einu tónleikar Slayer í Evrópu í sumar verða í Laugardalnum þann 23. júní. Það eru alls 112 mismunandi atriði sem búið er að kynna fyrir hátíðina í sumar og óhætt að fullyrða að það ættu allir að finna eitthvað við sitt hæfi. Af þessum eru 50 erlendir aðilar og með fylgja 62 frábærir íslenskir listamenn og hljómsveitir.

Þeir íslensku listamenn sem bætast við í dag eru:  

DJ Andrea Jóns  

Aron Can  

Birgir Hákon  

Birnir  

Carla Rosemary  

CasaNova  

Cosmic Bullshit  

DJ Frímann  

DJ Karítas  

Fever Dream  

Flóni  

For A Minor Reflection  

Gísli Pálmi  

Godchilla  

GusGus (DJ set)  

Helgi B X Igna  

Huginn  

Joey Christ  

Logi Pedro  

Mighty Bear  

Mike The Jacket  

Reykjavíkurdætur  

Skaði  

Stuðmenn  

Sturla Atlas  

Sura  

Sweaty Records  

Una Stef  

Valby Bræður  

Valdimar  

Young Karin