Fótbrotnaði illa við að safna jólatrjám fyrir bæjarfélagið sitt

Elvar Ásgeirsson, leikmaður Aftureldingar í handbolta, mun trúlega ekki spila meira í vetur en hann fótbrotnaði þegar hann rann í hálku við að safna jólatrjám fyrir Mosfellsbæ, sem er árleg fjáröflun handboltadeildarinnar. Hann heyrði löppina brotna þegar hann lenti. Fór í aðgerð á mánudag sem heppnaðist vel.

„Ef maður horfir á stóru myndina þá eru 12 vikur ekki langur tími en akkúrat núna, þegar ég ligg uppi í sófa, þá er ég auðvitað hundfúll,“ segir Elvar Ásgeirsson, leikmaður  Aftureldingar  í  handbolta, en hann varð fyrir því óláni að  fótbrotna  í  árlegri  fjáröflun deildarinnar, að safna saman jólatrjám Mosfellinga.

Litlar líkur eru á því að Elvar nái að klína á sig harpixi  það  sem  eftir  er  tímabilsins  en hann er þó ekki alveg búinn að gefa upp alla von. „Eins og staðan er í dag er ég ekki að horfa á þetta tímabil en ef liðsfélagar mínir fara alla leið þá er Íslandsmótið að klárast um miðjan maí.“

Elvar fór í aðgerð á mánudag sem heppnaðist  vel  enda  þótt  brotið  hafi  verið  ljótt  var  það  hreint  og  ökklinn  slapp.  Þeir  sem  hafa  séð  um hann segja að ef hann passi sig eigi beinið að gróa vel og verða jafn sterkt á ný – sem hann segir að sé ákveðinn léttir.

„Það   var   flughált   þegar   við  vorum að tína upp trén og ég var í  smá  halla  og  ætlaði  að  láta  mig  renna á báðum fótum að bílnum sem  við  vorum  á og  stoppa  mig  þannig   af.   Ég   rann   löturhægt   áfram  en  missti  skyndilega  fótanna  og  fann  að  ég  var  að  detta  á hnakkann. Ég ætlaði eitthvað að reyna að bjarga mér og setja vinstri löppina undir mig en hún krumpast og beyglast og ég dett á hana þannig að ég heyri hana brotna.“

Meiðsli Elvars eru mikið áfall fyrir  lið  Aftureldingar en Elvar er algjör lykilleikmaður í liðinu og er   næstmarkahæsti leikmaður liðsins á þessu tímabili með 69 mörk í 13 leikjum.

„Ég var að spila vel í desember fannst mér. En þetta er eitthvað sem gerðist  og  nú  þarf  ég  að  vera sterkur andlega. Ég er  ekkert  kornungur en ég á langan feril  fyrir  höndum,“  segir hann.

Þótt áfallið sé stórt sér Elvar ljós í myrkrinu og horfir meðal  annars  til  landsliðsmarkvarðarins í fótbolta, Hannesar Halldórssonar, sem meiddist skömmu fyrir Evrópumótið en kom til baka sterkari  en  áður.  

„Ég  tek  Hannes  klárlega  mér  til  fyrirmyndar  og  ætla að mæta bæði helskafinn og tilbúinn um leið og ég get.“