Lamborghini þakinn 1,3 milljónum Swarovski kristöllum

Þessi Lamborghini Huracán bíll á líklega engan sinn líkan því hann er með 1.300.000 Swarovski kristöllum í lakkinu sem hann var endurskrautaður með. Það má geta sér til að það hafi kostað skildinginn að þekja bíl sinn svo rækilega með kristöllunum, en það er reyndar ekkert nýtt fyrir eiganda bílsins.

Bíllinn er í eigu Daria Radionova en hún hefur áður átt fjölmarga rándýra lúxusbíla sem hún hefur einmitt þakið Swarovski kristöllum. Fyrir nokkrum árum lét hún þekja Mercedes Benz CLS 350 bíl sinn með einni milljón kristalla og þann bíl seldi hún svo á eBay fyrir 154.000 dollara.

Það er ekki nema von að bíllinn hafi vakið nokkra athygli á meðal vegfarenda í London, þaðan sem þetta myndskeið er. Þessi Lamborghini Huracán Vinceri Edition hennar Dariu Radionovu er með 610 hestafla V10 vél, svo hún ætti að komast hratt og örugglega á milli tískuverslananna í London.