Jaguar Land Rover er peningamaskína Tata

Breski bílaframleiðandinn Jaguar Land Rover er í eigu indverska bílaframleiðandans og Tata virðist hafa gert rétt með að kaupa fyrirtækið árið 2008 því Jaguar Land Rover skapar mestan hagnað fyrirtækisins. Á þriðja ársfjórðungi ársins varð mesti hagnaður af rekstri Tata í sögu fyrirtækisins og á Jaguar Land Rover þar mestan þátt.

Þessi þriðji ársfjórðungur skóp þrisvar sinnum meiri hagnað en sami ársfjórðungur síðasta árs. Hagnaðurinn nam 40,5 milljörðum króna en var 13,5 milljarðar í fyrra. Sala Jaguar Land Rover bíla jókst um 27% í Kína á ársfjórðungnum, en Kína er stærsti bílamarkaður heims.

Jaguar ætlar að gera enn betur á þessum ársfjórðungi í Kína með því að bjóða tengiltvinnútfærslu af Jaguar F-Pace jeppanum, sem ber þá reyndar nafnið Jaguar E-Pace og einnig tengiltvinnútgáfur af Range Rover og Range Rover Sport bílunum snemma á næsta ári.

Heildarsala Jaguar Land Rover var 149.600 bílar á þriðja ársfjórðungi og jókst um 5,1%. Hagnaður af sölu var 10,8%, sem er með því hæsta sem um getur í bílabransanum og vel yfir spám helstu greinenda.