Bestu og furðulegustu íslensku plötuumslögin

Á föstudaginn var opnuð í Hönnunarsafni Íslands sýning á íslenskum plötuumslögum og af því tilefni okkur nauðsynlegt að fá nokkra álitsgjafa til að segja frá uppáhaldsplötuumslagi sínu. Álitsgjafarnir völdu einnig það plötuumslag sem þeim fannst skrítnast/skemmtilegast

Arnar Eggert Thoroddsen, poppfræðingur

Flottast

múm – Loksins erum við engin / Finally We Are No One

Liturinn, hönnunin, áferðin og allt í kringum þessa plötu er bara dásamlegt. Kallar fram nostalgískar tilfinningar í manni. Tíu tommu vínylútgáfan undirstrikar þetta allt saman betur.

Furðulegast

Haraldur Guðni Bragason – Askur

Haraldur þessi gaf plötuna út sjálfur. Af nógu er að taka í hinum svonefnda hamfarapoppsgeira en þetta umslag er með þeim allra „bestu“. Það er nánast ekki hægt að koma því í orð, hvað fer um mann þegar maður sér þetta.

Kjartan Guðmundsson, upplýsingafulltrúi

Flottast

Utangarðsmenn – Geislavirkir (1980)

Vafalaust á nostalgían sinn þátt í því að mér finnst þetta umslag bera höfuð og herðar yfir önnur íslensk. Kjarnorkuváin svífur yfir vötnum og rímar þannig fullkomlega við plötutitilinn, umfjöllunarefni textanna og tíðarandann í upphafi níunda áratugarins þegar stóra sprengjan gat sprungið á hverri stundu. Flott, spennandi og afar vel heppnað, og rúsínan í pylsuendanum er svo þessi ógnandi Shatter-fontur í nafni hljómsveitarinnar. Fullkomið.

Furðulegast

Ólafur Arnalds – For Now I Am Winter (2013)

Titillinn á plötunni gefur tóninn fyrir ævintýralega tilgerðarlegt og þreytt umslag hjá ungum manni á uppleið. Gæti auðveldlega verið gullverðlaunahafi í heimsmeistarakeppninni í klisjum, þar sem listamaðurinn horfist í augu við tilgangsleysi allra hluta á meðan sjávargangurinn og brimrótið ólgar innra með honum. Gæti þó eflaust virkað sem framúrstefnuleg auglýsing fyrir lundabúð í Smáralind.

Þura Stína, hönnuður og plötusnúður

Flottast

Apparat Organ Quartet – Pólýfónía

Þetta umslag eftir Sigga Eggerts er svo vel gert, kannski aðallega því þér finnst umslagið standa fyrir það sem þú ert að hlusta á.

Furðulegast

Tvíhöfði – Allt 

Þetta er auðvitað bara alveg grilluð pæling og plötukoverin í samræmi við það, mjög kómísk og skrýtin en samt svo geggjuð.

Magnús Leifsson, leikstjóri

Flottast

Megas & Spilverk þjóðanna – Á bleikum náttkjólum

Ég kemst alltaf að þeirri niðurstöðu að þetta sé besta plötuumslagið. Fríkað og fallegt á sama tíma.

Furðulegast

Diddi Fel – Hesthúsið

Ég elska þetta plötuumslag. Ótrúlega góður bældleiki og skemmtileg tilvísun í Snoop Dogg – Doggystyle umslagið.