Allar gerðir Honda í Evrópu verða með rafmótorum

Bílaframleiðendur á bílasýningunni í Frankfurt keppast nú við að lýsa yfir áformum sínum um rafvæðingu bílaflota síns og sagði Honda frá því í gær í Frankfurt að hver einasta gerð sem boðin verður nýr í Evrópu verði með rafmótorum, annað hvort eingöngu eða til stuðnings brunavélum.

Honda menn vilja meina að eftirspurnin eftir slíkum bílum sé meiri í Evrópu en annarsstaðar. Honda gerir reyndar ráð fyrir því að tveir þriðju af sölu sinni muni verða með rafmótorum strax árið 2025. Honda hefur stórar áætlanir um sölu bíla sinna í Evrópu og leggur mikla áherslu á sölu bíla sinna þar.

Honda sýndi þennan Urban EV Concept bíl sinn á pöllunum í Frankfurt en hann gengur eingöngu fyrir rafmagni og er fremur smár borgarbíll. Honda gerir ráð fyrir að hann verði kominn á markað eftir um tvö ár. Einnig tilkynnti forstjóri Honda að tengiltvinnútgáfa af Honda CR-V væri nær tilbúin til markaðssetningar og er slíkur bíll líka til sýnis í Frankfurt. Verður það fyrsti slíki bíllinn sem í boði verður frá Honda í Evrópu og mun hann leysa af dísilútgáfu CR-V á meginlandi Evrópu.