Kia með einn gullfallegan í Frankfurt

Kia ætlar að sýna þennan mjög svo laglega tilraunabíl á bílasýningunni í Frankfurt í næsta mánuði. Þessi bíll á að gefa tóninn fyrir útlit næsta Kia cee´d sem kynntur verður á næsta ári og því virðist í fyrstu ekki vera meiningin að þessi bíll verði framleiddur í þessu formi.

Tilraunabíllinn er hannaður í hönnunarstúdíói Kia í Evrópu, en það er staðsett steinsnar frá sýningarsvæðinu í Frankfurt. Lagið á þessum bíl er svokallað „extended hot hatch“, eða lengdur smár kraftabíll og má gera ráð fyrir því að hann beri mestan svip af þriggja dyra útgáfu komandi nýrrar kynslóðar þriggja dyra Kia cee´d bílsins. Vonandi á það einnig við fjögurra dyra mun praktískari útgáfunnar líka.

Rétt eins og Hyundai ætlar að gera með i30 bíl sinn með því að bæta við „fastback“ útgáfu bílsins virðist Kia ætla að gera slíkt hið sama með cee´d bílinn, en þessir bílar eru systurbílar sem eiga margt sameiginlegt. Ef til vill væri fremur hægt að tala um tilvonandi „shooting brake“ útfærslu næsta cee´d, en lagið á þessum bíl er mjög í ætt við „shooting brake“ bíla Mercedes Benz, sem dæmi.

Þó að ekkert nafn sé komið á þennan tilraunabíl Kia ber hann þó stafina GT og er hann með lækkaða fjöðrun og það bendir til þess að Kia ætli að halla sér meira í áttina að sportlegum bílum. Á myndinni að dæma virðist enginn B-póstur vera á bílnum og er það enn betur til vitnis um sportlegt yfirbragð bílsins.

Hurðahöldurnar á tilraunabílnum eru innfelldar og engir hliðarspeglar og eykur það ennfremur á töffaraskapinn í hönnun þessa bíls. Eins og á við aðra nýja bíla á bílasýningunni í Frankfurt má búast við að bíllinn verði frumsýndur 12. september.