Yfir 300% söluaukning á Outlander PHEV

328% söluaukning varð á Mitsubishi Outlander PHEV tengiltvinnbílnum fyrstu sex mánuði þessa árs borið saman við sama tímabil í fyrra. Mitsubishi Outlander PHEV er einn af þeim bílum sem seldir eru á 100 ára afmælistilboði Mitsubishi hjá Heklu.

Um er að ræða vistvænan tengiltvinnbíll sem gengur fyrir bæði rafmagni og bensíni og hefur selst vel hér á landi. Fyrstu sex mánuði ársins seldust 227 eintök af Outlander PHEV sem er 328% aukning frá sama tímabili 2016. Reyndar er einn af hverjum fjórum rafbílum sem seldust á fyrstu sjö mánuðum ársins af gerðinni Outlander PHEV og tæplega helmingur allra nýskráðra rafmagns- og tengiltvinnbíla koma frá HEKLU. 

„Það hefur verið gaman að fylgjast með endurkomu Mitsubishi síðustu misserin en þessir bílar hafa alltaf átt pláss í hjarta Íslendinga sem kunna að meta gæði og gott verð. Nú í kringum 100 ára afmælið er þetta enn skemmtilegra að sjá,“ segir Haraldur Ársælsson, vörustjóri Mitsubishi. Þrír af hverjum fimm nýskráðum vistvænum bílum hér á landi á fyrstu 6 mánuðum ársins eru frá HEKLU.