Lengri sumarlokanir í verksmiðjum GM vegna dræmrar sölu

Dræm sala fólksbíla General Motors mun leiða til lengri sumarlokana í verksmiðjum fyrirtækisins í sumar. Dæmi um það er verksmiðja GM í Ohio sem framleiðir Chevrolet Cruze bílinn en þar var meiningin að loka í 2 vikur í sumar en ákveðið hefur verið að framlengja lokunina í 5 vikur. Það sama á við um verksmiðju GM í Kentucky þar sem Chevrolet Malibu bíllinn er framleiddur. Lokanirnar verða í tveimur síðustu vikum júní og fyrstu 3 vikum júlí.

Ekki er það sama upp á teningnum í verksmiðjum GM sem framleiða jepplinga, jeppa eða pallbíla. Sala Chevrolet Malibu hefur minnkað um 30% á þessu ári og munar um minna. General Motors hefur einnig brugðist við minnkandi sölu fólksbíla sinna með því að fækka vöktum í verksmiðjum sínum, úr þremur í tvær. Hjá GM er gert ráð fyrir því að í þeim verksmiðjum sem framleiddir eru fóksbílar muni starfsemin í æ meira mæli verða færð til framleiðslu jepplinga, jeppa og pallbíla.

Í byrjun júní átti GM 95 daga birgðir af bílum og hafði sú tala farið niður úr 97 dögum í byrjun maí, en er samt talsvert hærri en hjá öðrum bílaframleiðendum. Eftir 7 ára stöðuga aukningu í bílasölu í Bandaríkjunum hefur sala bíla minnkað það sem af er ári um 2%. Sala fólksbíla GM hefur á þessum tíma minnkað um 13%, en á móti kemur að sala á jepplingu, jeppum og pallbílum fyrirtækisins hefur aukist um 4,1%.