Á Lamborghini Huracan nú metið á Nürburgring?

Sögur herma að Lamborghini Huracan hafi bætt met Porsche 918 Spyder á Nürburgring brautinni í flokki fjöldaframleiddra bíla. Það þýðir að Lamborghini Huracan bíllinn hafi farið þessa 20 km löngu braut á styttri tíma en 6 mínútum og 57 sekúndum.

Lamborghini hefur ekki sagt frá þessari metbætingu enn, en til stendur að gera það á fimmtudaginn næsta og þá með pompi og prakt. Það verður semsagt rétt fyrir bílasýninguna í Genf, en nýi Lamborghini Huracan bíllinn mun verða til sýnis á bílasýningunni.

Nýr Huracan hefur bæði lést og bætt við sig afli, en að auki hefur loftflæði bílsins verið bætt til muna. Með því er hann orðinn talsvert hæfari til brautaraksturs en forverinn og það sést á þessari metbætingu. Það þarf nefnilega nokkuð mikið til að bæta hraðamet ofurbílsins Porsche 918 Spyder með sín 887 hestöfl.

Nýr Huracan hefur einnig fengið nýtt og betra pústkerfi, öflugri bremsur, hraðari sjálfskiptingu og betri dekk. Hér að ofan má sjá þegar nýr Huracan var reyndur til fulls á Nürburgring brautinni fyrir skömmu, en myndirnar náðust af forvitnum áhorfendum. Við þessar æfingar náðist metið athygliverða.