Baumruk og allir hinir tilbúnir að hjálpa til

Gunnar Magnússon, þjálfari Íslandsmeistara Hauka í handbolta, var mjög ánægður með hvernig allt félagið brást við þegar ekkert gekk hjá karlaliðinu í upphafi tímabilsins.

„Það leggjast allir á eitt. Stjórnin stóð dyggilega við bakið á mér og hjálpaði til eins og hún gat. Húsverðirnir, Petr Baumruk og þau öll þarna, voru öll að koma til mín og spyrja hvort þau gætu hjálpað. Það lögðust allir á eitt í félaginu fannst mér,“ segir Gunnar.

„Oft þegar illa gengur þá sér maður úr hverju menn eru gerðir og hvernig félagið er. Mér fannst svo frábært að sjá alls staðar að það voru allir tilbúnir að hjálpa og leggja sitt á vogarskálarnar.“