Rallýbíll þræðir elgshjörð

Finnskur rallökumaður verður að teljast heppinn að hafa ekki fengið elg fram á bíl sinn í keppni þar í landi fyrir skömmu og náðist atvikið á mynd innan úr rallbílnum. Fljótlega á einni sérleið rallsins ekur hann fram á elgsfjölskyldu og komast tveir elgir yfir veginn áður en sá þriðji birtist og virðist ætla beint framan á bílinn.

Ökumaðurinn hélt þó hraða sínum áfram ótrauður og elgurinn hættir við að fara yfir veginn á síðustu stundu. Ekki hefði mátt að sökum spyrja ef elgurinn hefði farið framan á bílinn og hefði þátttöku hans lokið þar og ef til vill á dramtískan hátt. Í myndskeiðinu hér að ofan gerist þetta þegar 1:58 mínúta er liðin.

Miðað við hræðsluöskrin innan úr bílnum stóð ökumanni og aðstoðarmanni hans ekki á sama er elgirnir birtust og engin furða. Seinna í myndskeiðinu sést að ökumaðurinn er í hálgerðu sjokki eftir atburðinn því hann fer ranga leið og styttir sér leið undir viðvörunarplastgirðingu sem strengd hefur verið yfir styttinguna. Lái honum hver sem vill.