Yfirverkfræðingur Toyota vill nafnið Supra á nýja sportbílinn

Toyota og BMW vinna nú sameiginlega að smíði nýs sportbíls, en hvorki í tilviki Toyota, né BMW er vitað hvað bílarnir eiga að heita. Nú hefur einn starfsmanna Toyota, reyndar yfirverkfræðingur fyrirtæksins, úttalað sig um hvað honum finnst að bíllinn eigi að heita, þ.e. Supra.

Það er ef til vill ekki svo langsótt hugmynd þar sem frægasti sportbíll Toyota bar einmitt það nafn, en hann hefur ekki framleiddur lengi. Yfirverkfræðingurinn, Tetsuya Tada, elskaði Supra bílinn en elskar einnig nafnið Supra. Tada er oft nefndur sem faðir Toyota 86 bílsins og hann vill viðhalda langri og árangurríkri sportbílasögu Toyota á lofti og telur að það verði best gert með því að viðhalda nafninu Supra á nýja bílnum.

Líklega verður Tada að ósk sinni ef marka má það að Toyota sótti einmitt um einkaleyfið á nafninu Supra í Evrópu fyrir stuttu. Hjá BMW verður þessi nýi sportbíll arftaki BMW Z4 bílsins og gæti því fengið nafnið Z5. Undirvagn og margt fleira verður sameiginlegt hjá Toyota og BMW en vélarnar gæti orðið ólíkar. Vel gengur að sögn beggja aðila með bílinn og er hann í prófunum um allan heim sem stendur.