Algjör mokveiði við opnun Ytri Rangár

Ytri Rangá opnaði fyrir veiðimönnum í morgun og það er ljóst að met hefur verið slegið í fjölda laxa á fyrstu vakt.

Svo til allar laxveiðiárnar sem hafa opnað fyrir veiði hafa átt frábæran fyrsta dag en það er ekkert sem hefur hingað til eða á eftir að ná veislunni sem var við bakka Ytri Rangá í morgun.  Samtals komu 87 laxar á land fyrir hádegi og þar af var ein os sama stöngin með 32 laxa og þar af 24 stórlaxa.  Áin hefur skilað svona morgnum á bestu dögunum á besta tímanum en að sjá svona veiðitölu á fyrsta degi er algjörlega fáheyrt.

Allir helstu veiðistaðir eru inni en að venju er Djúpós mjög sterkur sem og Tjarnarbreiða en mikið af laxi er líka í Ægissíðufossi, Staur og Hrafnakletta.  Aðstæður voru hinar bestu í morgun og voru veiðimenn jafnvel að spreyta sig á að hitcha suma staðina með góðum árangri en það er taktík sem ekki er notuð mikið svona á fyrsta degi.  Það má alveg reikna með að lokatala dagsins teygi sig í 150 laxa en þá er það líka þannig met að erfitt verður að slá það.