Tiltektardagur við Varmá á morgun og veiðileyfi í boði

Laugardaginn næstkomandi 11. júní fer fram tiltekt við Varmá í Hveragerði þar sem gengið verður meðfram ánni og tekið til hendinni.

Varmá er ein af þessum litlu skemmtilegu ám stutt frá Reykjavík þar sem hægt er að gera góða veiði og setja í stóra fiska.  Það hefur verið nokkuð áberandi við suma veiðistaðina að umgengni er ábótavant og rusl gjarnan skilið eftir.  Nú verður tekið til hendinni við að hreinsa rusl af bökkum Varmár og úr ánni.  Þeir sem vilja leggja til aðstoð sína mæta kl 10:00 við Stöðvarhyl þar sem menn bera saman bækur og skipuleggja tiltektina.

Við hvetjum sem flesta til að mæta því margar hendur vinna létt verk og það er skemmtilegt að hafa umhverfið sitt hreint.  Það eru allir velkomnir og þeir sem mæta fá stöng í Varmá í sumar að eigin vali, milli 15 júní og 15 ágúst frá SVFR sem þakkir fyrir vel unnin störf.