Einar Andri: Eru til myndbandsupptökur sem sanna mál mitt

Einar Andri Einarsson, þjálfari Aftureldingar, segir að sér hafi verulega brugðið við að hafa verið dæmdur í bann af aganefnd HSÍ í gær.

Eftir leik Aftureldingar og FH voru báðir þjálfararnir settir í leikbann vegna óíþróttamannslegrar framkomu í leikslok og það kemur Einari mjög á óvart.

„Ég segi bara eins og ég sagði í öðru viðtali í morgun að mér er bara verulega brugðið. Það voru engin læti eftir leikinn," sagði Einar Andri í samtali við Vísi í dag.

Sjá einnig:Aðalþjálfararnir báðir í bann

„Ég spurði dómaranna einnar spurningar og það eru myndbandsupptökur sem staðfesta það. Síðan verður aganefndin og dómararnir að svara fyrir restina,“ segir Einar en hver var þessi spurning? „Ég spurði dómarana af því af hverju þeir hefðu sett höndina upp eftir fimm sekúndur í lokasókn okkar. Ég fékk svar. Var ekki ánægður með svarið en lét gott heita og labbaði burt. Það voru mín einu samskipti við dómarana.“

Myndbandið sem um ræðir var birt á handboltavefsíðunni Fimmeinn en einhverra hluta vegna var myndbandinu síðan kippt út.

Afturelding getur skotið sér í undanúrslit með sigri í Kaplakrika á morgun, en Daði Hafþórsson, aðstoðarþjálfari Aftureldingar, mun stýra liðinu annað kvöld.

„Að öðru leyti vil ég ekki tjá mig um málið og það verður bara flottur handbolti í Kaplakrika á morgun milli tveggja góðra liða," sagði Einar Andri við Vísi að lokum.

Ekki náðist í Halldór Jóhann Sigfússon, þjálfara FH, við vinnslu fréttarinnar. Leikur FH og Aftureldingar hefst klukkan 19.30 og verður lýst í Boltavakt Vísis.