Skapa mögulega meistaraverk

„Við æfðum í gær en vitum ekki alveg hvað við erum að fara að gera, það er ekkert ákveðið,“ segir trommuleikarinn Magnús Trygvason Eliassen. Hann kemur fram á tónleikum í Mengi í kvöld ásamt norska bassaleikarinn Jo Berger Myhre og saxófónleikaranum Tuma Árnasyni.

Tríóið mun vera í frjálsum spuna frameftir kvöldi. „Annaðhvort kemur út meistaraverk eða það kemur ekki út meistaraverk. Þetta verður gaman og ég hlakka til,“ bætir Magnús við.

Jo Berger Myhre er nú búsettur í Reykjavík og hefur á undanförnum árum orðið eftirsóttur bassaleikari, og starfar um þessar mundir meðal annars með sænska tónlistarmanninum Mariam the Believer og norsku trompetgoðsögninni Nils Petter Molvær, auk fleiri góðra verkefna. Hann heldur einnig úti drone-jazzsveitinni Splashgirl.

Magnús er líklega best þekktur fyrir störf sín með Moses Hightower og Tumi fyrir að blása í gylltu flautuna fyrir hljómsveitirnar Grísalappalísu og Ojba Rasta.

„Þetta verður svona ekta Mengiskvöld, þar sem enginn veit hvað gerist fyrr en þeir byrja að spila, ekki einu sinni þeir sjálfir. Það er það sem er svo skemmtilegt og spennandi við Mengi, fólk hefur algjört listrænt frelsi,“ segir Ísgerður Gunnarsdóttir, upplýsingafulltrú Mengis. Tónleikarnir hefjast klukkan 21.00.