Framleiðslu Dodge Viper hætt 2017

Sala Dodge Viper sporbílsins hefur verið afar dræm á undanförnum árum og allt útlit er fyrir að framleiðslu hans verði hætt árið 2017. Frá janúar til september á þessu ári hafa aðeins selst 503 bílar og hefur salan minnkað um 8% það sem af er ári.

Dodge hefur reynt margt til að örva sölu bílsins, meðal annars með svokölluðu 1 to1 program, þar sem kaupendur bílanna geta persónugert sína bíla með ýmsu móti og Dodge hefur einnig framleitt ACR útgáfu bílsins sem sérhönnuð er til kappaksturs.

Allt hefur komið fyrir ekki og nú virðist bíllinn kominn á endastöð. Í Dodge Viper er 10 strokka vél án forþjöppu, keflablásara og rafmagnsmótora, svolítið gamaldags útfærsla á öflugum sportbíl. Svo virðist sem kaupendum líki ekki sú aðferðafræði og kaupi fremur bíla með nýrri tækni.