Svalbarðsá komin í 75 laxa á tvær stangir

Svalbarðsá var opnuð 1. júlí en þessi skemmtilega á er þekkt fyrir stórlaxa sem þar veiðast.

Stórlaxahlutfallið í ánni er með því besta, ef ekki það besta á landinu en staðan í ánni núna er sú að 75 laxar eru komnir á land og það sem vekur athygli er að þetta er allt stórlax. Aðeins er veitt á tvær stangir í ánni svo þetta er með besta móti þar nyrðra. Árnar í Þistilfirði koma gjarnan aðeins seinna inn en veiðin getur þó oft verið ágæt frá opnun.

Þeir sem hafa verið það heppnir eða öllu heldur sýnt það mikla forsjá að bóka með fyrirvara síðsumarið lenda iðullega í veislu þegar stóru hængarnir fara að taka flugurnar. Algengt er að ná 18-20 punda fiskum í ánni þó að mesta veiðin sé í stærðum 12-16 pund. Stærri fiskar sjást þó iðullega í henni en þeir eru heldur tregir í flugurnar. Það eru þó nokkrir lunknir veiðimenn sem setja iðullega í þessa laxa en þeir eru ekki margir sem hafa betur í baráttunni við þessa höfðingja.

Meðalveiðin í Svalbarðsá er 416 laxar en mesta veiðin var árið 2011 en það ár veiddust 573 laxar.