Infinity fær Benz vélar

Það er ekki óþekkt að bílar fái vélar sem framleiddar eru af öðrum bílaframleiðendum, en sumir bílaframleiðendur eru einfaldlega betri í því að framleiða vélar en aðrir. Infinity, lúxusmerki japanska framleiðandans Nissan hefur einmitt gripið til þess ráðs að fá vélar frá Mercedes Benz í Q30 bíl sinn.

Hann mun bjóðast með 1,6 og 2,0 lítra bensínvélum frá Benz, sem og 2,1 lítra dísilvél. Þessar vélar finnast einnig í A-Class bíl Mercedes Benz og á Infinity Q30 bíllinn fleira sameiginlegt með Mercedes Benz A-Class, en mestur hluti undirvagns bílsins er sá sami.

Þessi Infinity Q30 bíll er nýr í bílalínu lúxusbílamerkisins og ætlað að uppfylla þarfir bílkaupenda sem kjósa lúxusjepplinga. Þetta samstarf Mercedes Benz og Nissan-Renault nú er þrettánda samstarfsverkefni fyrirtækjanna frá því það hófst árið 2010.

Infinity hefur á undanförnum árum ekki tekist að hrifsa til sín mikinn markað fyrir lúxusbíla frá þýsku bílaframleiðendunum í Evrópu, en hefur þó tekist í ár að auka sölu sína um 56% í álfunni. Bak við það eru þó einungis 2.310 seldir bílar.