Garðar úr Digranesinu í Kaplakrikann

FH-ingar bættu við sig leikmanni í gær fyrir átökin í Olís-deild karla á næsta tímabili þegar Garðar Svansson skrifaði undir þriggja ára samning við Fimleikafélagið. Þetta kemur fram á heimasíðu FH.

Garðar kemur frá HK þar sem hann hefur leikið allan sinn feril.

Hann skoraði 53 mörk í 23 leikjum fyrir HK á síðasta tímabili en liðið endaði í neðsta sæti Olís-deildarinnar og féll niður um deild.

FH-ingar enduðu í 4. sæti deildarinnar í vetur og duttu svo úr leik fyrir Haukum í fyrstu umferð úrslitakeppninnar.